काठमाडौं (हाम्रो खेलकुद) – एएफसी एसियन कप छनोट चरण अन्तर्गत ताजकिस्तानको घरेलु मैदानमा भएको खेलमा नेपाली टोली पहिलो हाफको अन्त्यमा १ गोलले पछि परेको छ । गोलकिपर किरणले उत्कृष्ट प्रदर्शन गरेपनि पेनाल्टी मार्फत घरेलु टोलीले खेलमा अग्रता लिएको हो ।

घरेलु टोली ताजकिस्तान पहिलो हाफको सुरुआतदेखि आक्रामक देखियो । खेलको पहिलो मिनेटदेखि नेपाली टोलीका डिफेन्डर व्यस्त देखिए । पहिलो मिनेटमा अनन्त तामाङ्गले डि बक्सबाट क्लियर गर्दै ताजकिस्तानको आक्रमण रोकेका थिए ।

हाल माल्दिभ्सको टिसी स्पोर्ट्स क्लबमा व्यवसायिक फुटबल खेल्दै आएका गोलकिपर किरण कुमार लिम्बुले खेलको सुरुआती १० मिनेट भित्र दुई उत्कृष्ट बचाउ गर्दै घरेलु टोलीलाई अग्रता लिनबाट रोके । चौथो मिनेटमा अलिएभ जाहाङ्गिरको हेड मार्फतको प्रहारलाई किरणले उत्कृष्ट बचाउ गरेका थिए , रिबाउन्डमा भासिएभले राम्रो अवसरलाई सदुपयोग गर्न सकेनन । आठौँ मिनेटमा किरणले अन्मार्क्ड रहेका जालिलोभको बक्स भित्रबाटको कडा प्रहारलाई दाँया तर्फ डाइभ गर्दै बचाएका थिए । त्यसको लगतै ९ औं मिनेटमा ताजकिस्तानका जाहाङ्गिरको १८ यार्डको प्रहार पोस्टमा लागेर फर्किएको थियो ।

दबाबमा सुरुआत गरेको नेपाली टोलीले १४ औं मिनेटमा गोल गर्ने अवसर पाएपनि विमल घर्ती मगरको हेडर बाहिरिएको थियो । सुजल श्रेष्ठले लेफ्ट विङ्गबाट गरेको क्रसमा विमलले हेड राम्रोसङ्ग लागेन ।

ताजकिस्तानले २० औं मिनेटमा पेनाल्टी मार्फत गोल गर्दै अग्रता लियो । अनन्तले ताजकिस्तानको क्रस ब्लक गर्ने क्रममा विवादास्पद पेनाल्टी पाएको ताजकिस्तानका कप्तान ड्याभरोनोभको राम्रो प्रहारमा गोल गर्दै अग्रता लियो । किरणले सही दिशा तर्फ डाइभ गरेपनि ड्याभरोनोभको शक्तिशाली प्रहारले किरणलाई बिट गरेको थियो ।

पहिलो हाफको अन्तिम समयतिर अन्जनले सुरु गरेको काउन्टर एट्याकमा विमलले पुनः अन्जनलाई दिएको पासमा अन्जनको बक्स भित्रबाटको प्रहार आकाशिएको थियो ।