कार्डिफ (एजेन्सी) – वेल्स रसिया विश्वकपमा छनोट हुन असफल भएको छ । विश्वकप छनोट अन्र्तगत युरोपेली छनोटको समूहको ‘डी’ को अन्तिम खेलमा आयरल्याण्डसँग १–० ले पराजित भएसँगै वेल्सको विश्वकप यात्रा टुङ्गिएको हो ।

विश्वकपमा स्थान बनाउनको लागि जित्नैपर्ने खेलमा घरेलु मैदानमै पराजित भएपछि वेल्स विश्वकपमा स्थान बनाउन असफल भएको हो । वेल्स समूह ‘डी’ मा १७ अंकसहित तेस्रो स्थानमा रहन सफल भयो । वेलसलाई पराजित गरेको आयरल्याण्डले भने प्ले अफलाई स्थान सुरक्षित गरेको छ ।

स्टार खेलाडी ग्यारेथ बेलविनै मैदान उत्रिएको वेल्सले खेलभर आयरल्याण्डलाई दबावमा राखेपनि गोल गर्न सकेन । आयरल्याण्डले पाएको मौकालाई खेर फालेन । खेलको ५७ औं मिनेटमा जेम्स म्याकक्लिनले गरेको एकमात्र गोल नै आयरल्याण्डको जितमा निर्णायक बन्यो ।

यो समूहबाट सर्विया शीर्ष स्थानमा रहँदै विश्वकपमा सोझै छानिन सफल भयो । सोमबार राति नै भएको खेलमा सर्वियाले जर्जियालाई १–० ले नै पराजित गर्दै विश्वकपमा स्थान बनाउन सफल भएको हो । जर्जियाको जितमा ७४औं मिनेटमा एलेक्सजेन्डर प्रिजोभिकले गरेको गोल नै निर्णायक बन्यो । यही समूहको अर्काे खेलमा अष्ट्रियाले माल्दोभामाथि १–० कै जित निकाल्यो ।