काठमाडौं (एजेन्सी) – एएफसी एसियन कप छनोटअन्तर्गतको समूह चरणको चौथो खेलको लागि नेपाली राष्ट्रिय फुटबल टोली ताजिकिस्तान प्रस्थान गरेका छ।

तस्विर : एन्फा

ताजिकिस्तान जाने नेपाली टोलीलाई अखिल नेपाल फुटबल संघ (एन्फा) ले शुक्रबार एक कार्यक्रमका बीच बिदाई गरेको छ । टोलीलाई एन्फाका अध्यक्ष नरेन्द्र श्रेष्ठ, राष्ट्रिय खेलकुद परिषद (राखेप) का सदस्य सचिव केशव कुमार विष्ट, एन्फाका वरिष्ठ उपाध्यक्ष मणि कुँवरलगायतले बिदाई गरे । नेपाली टोली आजै राति ९ बजे ताजिकिस्तान प्रस्थान गर्नेछ । नेपालले असोज २४ गते ताजिकिस्तानसँग खेल्दैछ । यसअघि नेपालमै गत भदौं २० गते भएको खेलमा नेपाल ताजिकिस्तानसँग २–१ ले पराजित भएको थियो ।

बिदाई कार्यक्रममा बोल्दै एन्फाका अध्यक्ष नरेन्द्र श्रेष्ठले छनोटमा अझै तीन खेल बाँकी रहेकाले छनोट हुने विश्वास ब्यक्त गरे । अध्यक्ष श्रेष्ठले नेपाली टोलीले तिहारको उपलक्ष्यमा ताजिकिस्तानलाई पराजित गर्दै सारा नेपालीलाई खुशी दिनेमा आफु विश्वस्त रहेको बताए । कप्तान विराज महर्जनले ताजिकिस्तान नेपालकै स्तरको टिम रहेकाले विगतका गल्तीलाई सुधार्दै निश्चित जितको लागि खेल्ने बताए ।

एन्फाले दुई दिन अघि मात्रै २३ सदस्यीय टिमको घोषणा गरेको थियो । समूह ‘एफ’मा रहेको नेपालको तीन खेलबाट १ अंक जोड्दै तालिकामा पुछारमा छ । नेपाल रहेको समूहमा फिलिपिन्स ७ अंकसहित शीर्ष स्थानमा रहँदा ५ अंकसहित यमन दोस्रो तथा ३ अंकसहित ताजिकिस्तान तेस्रो स्थानमा छ ।

नेपालले अब फिलिपिन्ससँग घरेलु मैदानमा र यमनसँग अवे खेल बाँकी छ ।