क्रुबोङ (एजेन्सी) – युद्धग्रस्त देश सिरियाले पहिलोपटक एसियाली क्षेत्रबाट रसियामा अर्काे वर्ष आयोजना हुने रसिया विश्वकप खेल्ने सम्भावाना जीवितै राखेको छ । एसिया क्षेत्रको खेलमा सिरियाले बिहिबार राति प्ले अफ छनोटको पहिलो लेगमा अष्ट्रेलियालाई १–१ गोलको बराबरीमा रोक्दै पहिलोपटक विश्वकप खेल्ने सम्भावना जीवितै बनाएको हो ।

एसियाली क्षेत्रबाट इरान, जापान, दक्षिण कोरिया र साउदी अरब गरी चार टिमले विश्वकपमा स्थान सुरक्षित गरिसकेका छन् । यि दुई टिम बीच दोस्रो लेग अक्टोबर १० मा अष्ट्रेलियामा हुदैछ । सिरिया र अष्ट्रेलियामध्येबाट प्ले अफमा छनोट हुने टिमले कोनकाफ क्षेत्रको चौथो स्थानमा रहेको टिमसँग छनोटको लागि अन्तिम प्ले अफ खेल्नेछ ।

हाङ जिवट स्टेडियममा ४० औं मिनेटमा खेलमा पछि परेको घरेलु टोली सिरियाले दोस्रो हाफको अन्तिम समयमा बराबरी गोल फर्कायो ।

सिरियाले खेलको ८५ औं मिनेटमा पेनालटीमार्फत बराबरी गोल फर्काएको हो ।  अष्ट्रेलियाका म्याथ्यु लेक्कीले डि बक्समा सिरियाका ओमार अल सोमाहलाई फल गरेपछि रेफ्रीले पेनाल्टी दिएको थियो । जसमा ओमार अल सोमाहले गल्ती गरेनन् । त्यसअघि एकपक्षीय बनेको खेलमा सिरियाले दवाव झेलेपनि एक गोल मात्रै बेहोरेको थियो । खेलको ४० औं मिनेटमा अष्ट्रेलियाका रुब्बी क्रुसले गोल गर्दै पाहुना टोलीलाई अग्रता दिलाएका थिए ।

रुब्बीले म्याथ्यु लेक्कीको पासमा सहज गोल गरेका थिए । ४४ औं मिनेटमा म्याथ्यु लेक्कीको प्रहार क्रसबारमा लाग्दा अष्ट्रेलियाले पहिलो हाफमै अग्रता दोब्बर पार्ने सुन्दर मौका खेर फालेको थियो । दोस्रो हाफमा पनि अष्ट्रेलियाले गोलको अवसर बनाएपनि गोल गर्न सकेन ।