बुइनस आइरिस (एजेन्सी)– कार दुर्घटनामा घाइते भएका सर्जियो अगुइरो कम्तीमा ६ साता मैदान बाहिर रहने अर्जेन्टिना फुटबल टोलीका डक्टरले दाबी गरेका छन् ।

अर्जेन्टिनी सहकर्मी लियोन मेस्सीसँग सर्जियो अगुइरो (दायाँ) ।

गत साता साता आम्सरड्याममा कार दुर्घटनामा परेका म्यानचेस्टर सिटीका स्ट्राइकरको करङ हड्डी भाच्चिएको बताइएको छ । जसका कारण उनले शनिबार सिटीले चेल्सी १–० ले हराएको खेल गुमाएका थिए । उनको चोटका बारेमा सिटीले भने ठिक हुन दुई देखि चार साता लाग्ने उल्लेख गरेपनि अर्जेन्टिना फुटबल टोलीका डक्टर डोनाटो भिलानीले त्यो भन्दा बढी समय लाग्ने बताएका छन् ।

‘भावनात्मक रुपमा उनी निकै दुःखी भएका छन् । किनकी उनी राष्ट्रिय टोलीका लागि खेल्न चाहन्थे । तर दुर्घटनाका कारण उनले दुवै खेल गुमाउनु पर्नेछ,’ उनले भने, ‘कम्तीमा डेढ महिना उनी बाहिर हुनेछन् । उनी घर छोड्न सक्ने अवस्थामा पनि छैनन् । कारमा बस्नमा निस्कन पनि उनलाई कठिन छ । उनी साच्चै निराश छन् किनकी उनी टोलीसँग रहन चाहान्थे ।’

दक्षिण अमेरिकी विश्व कप छनोटका अन्तिम दुई खेलमध्ये अर्जेन्टिनाले शुक्रबार पेरु र अक्टुबर ११ मा इक्वेडरसँग प्रतिस्पर्धा गर्दैछ । छनोट अंकतालिकाको चौथो स्थान सम्म रहने टोली स्वतः विश्व कपका लागि छनोट हुने छ भने पाँचौं टोलीले ओसिएनाको विजेतासँग प्ले अफ खेल्नु पर्नेछ ।  दुई खेल बाँकी रहँदा अर्जेन्टिना पाँचौं स्थानमा छ ।

अगुइरोले यो सिजनका ८ खेलमा ७ गोल गरिसकेका छन् । उनी क्लबको सर्वाधिक गोलकर्ताको बराबरीका लागि १ गोलले टाढा छन् । सन् १९३९ मा इकिर ब्रुकले सिटीका लागि १ सय ७७ गोलको कीर्तिमान बनाएका थिए । अगुइरोका बारेमा डक्टर भिलानीको भनाईलाई लिएर सिटीले कुनै प्रतिक्रिया जनाएको छैन ।