लण्डन (एजेन्सी) – प्रिमियर लिगमा आर्सनलले ब्राइटन एण्ड हुभ एल्बियनलाई २-० ले हराउँदै यस सिजन आफ्नो घरेलु मैदानमा शतप्रतिशत नतिजा कायम राखेको छ । आर्सनलको जितमा नाचो मोनरियाल र एलेक्स इवोबिले गोल गरेका थिए ।

खेलको पहिलो केहि समयमै आर्सनलका एलेक्सान्डर लाकाजेटको प्रहार पोस्टमा लागेको थियो । आर्सनलको आक्रमक मानसिकता त्यहिंबाट झल्किन्थ्यो । खेलको १६ औं मिनेटमा आर्सनलले अग्रता लिन पनि सफल भयो । हेक्टर बेल्लेरिनको ब्लक भएको प्रहार फर्किँदा मोनरियालले त्यसको सदुपयोग गर्दै आर्सनललाई खेलमा अग्रता दिलाएका थिए ।

त्यस्तै दोस्रो हाफको ५६ औँ मिनेटमा एलेक्सिस सान्चेजको सुन्दर ब्याक-हिल पासलाई बलियो प्रहार गर्दै इवोबिले घरेलु टोलीको जित सुनिश्चित गरेका थिए । यस जितसँगै आर्सनल तालिकाको पाँचौं स्थानमा उक्लेको छ भने ब्राइटन ७ अंकसहित १४ औं स्थानमा रहेको छ ।

त्यस्तै उपाधि दाबेदार मानिएको अर्को टोली लिभरपुल भने न्यु क्यासल युनाटेडसँग १-१ को बराबरी खेलेको छ । फिलिप कौटिन्होले लिभरपुललाई २९ औँ मिनेटमा आकर्षक गोलद्वारा अग्रता दिलाएका थिए । तर त्यसको ७ मिनेटपछि जोसेलुले खेल बराबरी बनाएका थिए ।

लिभरपुल सातौँ स्थानमा झरेको छ भने न्यु क्यासल नवौँ स्थानमा उक्लेको छ । त्यस्तै गए राति प्रिमियर लिगमा खेलिएको अन्य खेलमा बर्नलीले एभर्टनलाई १-० ले हराएको छ । बर्नलीका लागि निर्णायक गोल जेफ हेन्ड्रिकले गरेका थिए ।