पेरिस (एजेन्सी) – फ्रान्सेली लिग १ मा गए राती पेरिस सेन्ट जर्मन (पिएसजी) ले बोर्डोमाथि ६-२ को शानदार जित हात पारेको छ । यस जितसँगै पिएसजीले आफ्नो अपराजित यात्रा कायम गर्दै अंकतालिकाको पहिलो स्थानमा पनि पकड बनाएको छ ।

खेलभरी निकै आक्रामक रुपमा प्रस्तुत भएको पिएसजीले पहिलो हाफमा ५ गोल गरेको थियो । खेलको पाँचौं मिनेटमा पाएको फ्रिकिकलाई नेयमारले ३५-यार्डबाट सुन्दर गोल गरेका थिए । त्यस्तै एघारौँ मिनेटमा नेयमारकै पासमा एडिन्सन काभानीको प्रहारद्वारा घरेलु टोलीले आफ्नो अग्रता दोब्बर बनाएको थियो ।

खेलको २० मिनेटमै डिफेन्डर थोमस म्युनियरले डि-बक्स भित्रबाट गरेको बलियो प्रहारमार्फत पिएसजी ३-० को अग्रता लिन सफल भएको थियो । तर बोर्डोका युनोस सांखारेले ३१ औं मिनेटमा गोल गर्दै बोर्डोले खेलमा फर्किने झिनो आशा देखाएको थियो ।

तर नेयमारले ४० औं मिनेटमा गोल गर्दै बोर्डोको आशा त्यहिं समाप्त पारिदिए । पेनाल्टिमार्फत नेयमारले गरेका सो गोल लिग १ मा उनको छैठौँ गोल थियो । यस सिजन उनले ५ असिस्ट पनि गरिसकेका छन् । फ्रिकिक र पेनाल्टी कसले लिने भन्ने काभानी र नेयमार बीचको विवाद पनि नेयमारका फ्रिकिक र पेनाल्टी गोलबाट यहिं समाप्त भएको देखिन्छ ।

त्यस्तै पहिलो हाफको अन्तिम मिनेटतिर किलियन बाप्पेको सुन्दर पासमा जुलियन ड्राक्सलरले भलि गर्दै स्कोर ५-१ बनाएका थिए । खेलको ५८ औं मिनेटमा भने बाप्पे आफैंले गोल गर्दै पिएसजीका लागि आफ्नो पाँचौं गोल गरे । ९० औं मिनेटमा बोर्डोका फरवार्ड माल्कमले पेनाल्टीमार्फत गोल गर्दै स्कोर ६-२ बनाएका थिए ।

जितसँगै पिएसजीले आफ्नो ८ खेलमा २७ गोल गर्दै २२ अंक बटुलेको छ । त्यस्तै बोर्डो भने सिजनको पहिलो हारपश्चात तालिकको पाँचौं स्थानमा झरेको छ ।