लण्डन (एजेन्सी) – प्रिमियर लिगमा म्यानचेस्टर सिटीले चेल्सीलाई १-० ले हराएको छ । सिटीको जितमा मिडफिल्डर केभिन डे ब्रुयनले दोस्रो हाफमा शानदार गोल गरेका थिए ।

म्यानचेस्टर सिटी आफ्ना यस सिजनका सर्वाधिक गोलकर्ता सर्जियो अगुएरो बिना मैदानमा उत्रेको थियो । अगुएरो बिहीबार कार दुर्घटनमा परेका कारण दुई महिनाका लागि खेल मैदानबाट बाहिर हुने बताइएको छ । त्यस्तै चेल्सीले पनि पहिलो हाफको ३५ औं मिनेटमै आफ्नो मुख्य फरवार्ड एल्भारो मोराटालाई चोटका कारण गुमाएको थियो ।

पहिलो हाफको अन्तिम समयतिर सिटीले पहिलो ठुलो मौका पाएको थियो । सो मौकामा फेर्नान्डोको हेडर चेल्सीका गोलकिपर थिबो कोर्टुवाले आकर्षक बचाऊ गरेका थिए । तर चेल्सीका पूर्व खेलाडीसमेत रहेका डे ब्रुयन खेलमा निर्णयक निर्णायक सावित भए । खेलको ६७ औँ मिनेटमा डि-बक्स बाहिरबाट उनले गरेको प्रहार नै सिटीलाई ३ अंक दिलाउन पर्याप्त भएको हो ।

त्यसपछि ग्याब्रियल जेससको भलिलाई एन्टोनियो रुडिगरले गोल लाइनबाट क्लियर गर्दै सिटीलाई थप गोल गर्नबाट रोकेको हो । यस जितसँगै सिटी फेरि अंकतालिकको अग्रसथानमा उक्लेको छ । खेलअघि म्यानचेस्टर युनाइटेडले क्रिस्टल प्यालेसलाई ४-० ले हराउँदा युनाइटेड पहिलो स्थानमा उक्लेको थियो । त्यस्तै चेल्सी भने तालिकाको चौथो स्थानमा झरेको छ ।