म्यानचेस्टर (एजेन्सी) – म्यानचेस्टर युनाइटेडले आफ्नो घरेलु मैदान ओल्ड ट्राफोर्डमा क्रिस्टल प्यालेसलाई ४-० को फराकिलो गोलअन्तरले हराएको छ । युनाइटेडको जितमा मरोएने फेलाइनीले दुई गोल गरे ।

खेलको तेस्रो मिनेटमै मार्कोस रासफोर्डको पासमा जुवान माटाले गरेको प्रहारद्वारा म्यानचेस्टर युनाइटेडले अग्रता लिन सफल भएको थियो । त्यस्तै खेलको ३५ औँ मिनेटमा फेलाइनीले स्कोर २-० बनाए भने उनले नै दोस्रो हाफको ४९ औँ मिनेटमा रासफोर्डको फ्रिकिकमा हेडरद्वारा गोल गरेका थिए ।

खेलको अन्तिम समयतिर परिवर्तित खेलाडी एन्थोनियो मार्सियालको पासमा रोमेलु लुकाकुले गोल गर्दै युनाइटेडको सहज जित पुरा गरेका थिए । यस गोलसँगै लुकाकुले युनाइटेडका लागि पहिलो ७ खेलमा ७ गोल गर्दै एन्डि कोलको रेकर्ड बराबरी गरेका छन् ।

यस जितसँगै युनाइटेड अंकतालिकाको शीर्ष स्थानमा उक्लेको छ भने क्रिस्टल प्यालेस पुछारमा यथावत् रहेको छ । क्रिस्टल प्यालेसले आफ्ना ७ खेलमा न कुनै अंक बटुलेको छ, न गोलै गरेको छ । इङ्ग्लिस प्रिमियर लिगको इतिहासमा यो कुनै पनि टोलीका लागि सबैभन्दा खराब सुरुवात हो ।

प्रिमियर लिगको शनिबार खेलिएको अन्य खेलहरुको नतिजा –

बोर्नमाउथ ०-० लेस्टर सिटी

स्टोक सिटी २-१ साउथह्याम्पटन

वेस्ट ब्रोम २-२ वाटफोर्ड

वेस्ट ह्याम १-० स्वान्सि सिटी