लण्डन (एजेन्सी) – प्रिमियर लिग तालिकाको तेस्रोमा रहेको चेल्सीले शीर्ष स्थानमा रहेको म्यानचेस्टर सिटीलाई आज स्ट्यामफोर्ड ब्रिजमा स्वागत गर्दै छ । नेपाली समयअनुसार खेल रातिको १०.१५ बजे सुरु हुने छ ।

म्यानचेस्टर सिटीको लागि सबैभन्दा ठुलो धक्का भने उसका यस सिजनका सर्वाधिक गोलकर्ता सर्जियो अगुएरोको अनुपस्थिति हुने छ । यो सिजन ६ गोल गरिसकेका अगुएरो बिहिबार आम्सटरड्याममा कार दुर्घटनामा परेका थिए ।

करङको हड्डी भाँचिएकाले अगुएरो २ महिनासम्म खेल्न नसक्ने बताइएको छ । त्यस्तै क्रिस्टल प्यालेससँगको ५-० को जितमा घाइते भएका सिटीका डिफेन्डर बेन्जामिन मेन्डि पनि लामो समयका लागि टोलिबाट बाहिरिने पक्का भएको छ । कप्तान भिन्सेन्ट कम्पनी पनि सिटीका लागि हाल घाइते रहेका छन् ।

अर्को तर्फ च्याम्पियन्स लिगमा एट्लेटिको म्याड्रिडलाई २-१ ले हराएको चेल्सीको मनोबल उच्च हुने छ । उसका डिफेन्डर डेभिड लुइज रातो कार्ड पाएका कारण यस खेलमा खेल्न प्रतिबन्धित छन् भने कप्तान गेरी केहिल टोलीमा फर्कँदै छन् ।

सिटीसँग आफ्नो घरेलु मैदानमा चेल्सीले अघिल्ला सातमध्ये केवल एक खेल हारेको छ । त्यस्तै यहि वर्ष फेब्रुअरीमा एफए कपमा भएको दुई टोली बीचको भिडन्तमा पनि चेल्सी ५-१ ले विजयी रहेको थियो ।