म्यानचेस्टर (एजेन्सी) – प्रिमियर लिगमा यस सिजन अपराजित रहेको म्यानचेस्टर युनाइटेड आज आफ्नो घरेलु मैदान ओल्ड ट्राफोर्डमा क्रिस्टल प्यालेसलाई स्वागत गर्दै छ । खेल आज राति नेपाली समयअनुसार ७.४५ बजे सुरु हुने छ ।

म्यानचेस्टर युनाइटेडका लागि डिफेन्डर फिल जोन्स घाइते रहेका कारण उनी नखेल्ने सम्भावना छ । त्यस्तै एन्थोनी मार्सियाल, मोरोएने फेलाइनी र एन्टोनियो भ्यालेन्सिया पनि चोटिल रहेका छन् । बुधबार च्याम्पियन्स लिगमा सिएसकेए मोस्कोलाई ४–१ ले हराए पनि युनाइटेडले टोलीमा धेरै हेरफेर नगर्ने सम्भावना छ ।

प्यालेस भने यस सिजनका आफ्ना ६ खेलमा सबै खेल गुमाउँदै एक गोल पनि गर्न सकेको छैन । यो इङ्ग्लिस प्रिमियर लिगकै इतिहासमा कुनै पनि टोलीका लागि सबैभन्दा खराब सुरुवात हो । प्यालेसका फरवार्ड क्रिस्टियन बेन्टेके घाइते रहेकाले यस खेलमा सहभागी हुने छैनन् । मिडफिल्डर विल्फ्रिड जाहा भने लामो समयका लागि घाइते रहेका छन् ।

गोल अन्तरका आधारमा म्यानचेस्टर सिटीसँग पछि पर्दै तालिकाको दोस्रो स्थानमा रहेको युनाइटेडले यस खेलमा आफ्नो गोलअन्तर अझ राम्रो बनाउन

खोज्ने छ । घरेलु टोलीले प्यालेस विरुद्धका पछिल्ला १६ खेलमा एउटा खेल पनि गुमाएको छैन । अर्को तर्फ युनाइटेडलाई निराश पार्दै प्यालेस आफ्नो सिजनको पहिलो अंकको खोजिमा हुने छ ।