मिलान(एजेन्सी)– इङ्ल्यान्डका पूर्व कप्तान डेभिड बेकह्यामले एसी मिलानप्रति आफ्नो निकै लगाव रहेको उल्लेख गर्दै पूर्व क्लबले युरोपियन फुटबलमा पुनः उचाई प्राप्त गर्ने विश्वास लिएका छन् । लोनमा सन् २००९ र २०१० मा दुई वर्ष मिलानमा बिताएका पूर्व मिडफिल्डरले त्यहाँ खेल्दा केही सुखद अनुभुती रहेको सुनाएका छन् ।

यहाँ मेरो धेरै सुखद स्मरणहरु छन् । ती मेरा लागि विशेष छन् । क्लब, यसका समर्थक र यो शहरले मलाई खुला हृदयले स्वागत गरेको थियो, ला गजेटा डेलो स्पोर्टससँगको कुराकानी क्रममा बेकह्यामले भनेका छन्, म इटाली र मिलानमा खेल्न मन पराउँथे । मैले मिलान र यो देशलाई मिस गरेको छु ।

उनले थपे, यहाँ बस्दा मलाई परिवारमा बसेको अनुभुती मिल्यो । मिलान र क्लबको लामो इतिहास छ । यहाँका मानिस, खाना र जति मैले जति साथी बनाए सबैलाई माया गर्छुु । बेकह्यामले मिलान पुनः बलियो बनेर फर्कनेमा आशावादी थिए । मलाई आशा छ मिलानले फेरी पनि आफ्नो उद्देश्यका लागि संघर्ष गर्नेछ, म्यानचेस्टर यूनाइटेडका पूर्व खेलाडी समेत रहेका बेकह्यामले भने, सिरी ए अहिले पनि विश्वको प्रतिस्पर्धात्मक र रोमाञ्चक लिग मध्ये एक हो ।

आफ्नो खेल जीवन प्रति कुनै गुनासो छ भन्ने प्रश्नका जवाफमा स्पेनिस क्लब रियल म्याड्रिडका पूर्व स्टारले भने, गुनासो । केही छैन । म्यानचेस्टर युनाइटेड खेल्दा म सानै थिए । मलाई त्यो क्लबको माया लाग्छ । मैले जति सक्थे त्यहाँ जिते । विश्वकै उत्कृष्ट केही क्लबबाट खेले । त्यहाँबाट खेल्दा मैले अलग संस्कृतीको अनुभव बटुल्ने मौका पाए ।