पेरिस (एजेन्सी)– पेरिस सेन्ट जर्मेन (पिएसजी) का फरवार्ड इडिन्सन काभानीले टोलीको एकतामा जोड दिएका छन् । काभानी र नेयमारबीच केही दिन यता सम्बन्ध खराब भएको समाचार लगातार सार्वजनिक भएपछि काभानीको यस्तो भनाई आएको हो ।

दक्षिण अमेरिकी यी दुई स्टारबीच लियोनमाथि २–० को जित हासिल भएको खेलमा पेनाल्टी कसले हान्ने विषयमा विवाद मैदानमा विवाद परेको थियो । जसका कारण काभानी र नेयमारबीच सम्बन्ध चिसिएको अनुमान गरिएको थियो ।

पेनाल्टी घटनापछि पहिलो पटक गए राती एकै पटक मैदानमा देखिएका उरुग्वेली काभानी र ब्राजिलियन नेयमारबीच हार्दिकता देखिएको थियो । च्याम्पियन्स लिगको समूह चरणको उक्त खेलमा पिएसजीले बायर्न म्युनिखलाई ३–० ले हराएको थियो ।

सो खेलका दौरान नेयमार र काभानीले अंकमाल गरेका थिए । यद्दपी त्यो खेलभन्दा अघि यी दुईले एकअर्काको आँखा पनि नजुधाएको हल्ला चलेको थियो । बायर्न म्युनिखसँगको जितपछि काभानीले हरेक मान्छे अलग स्वभावको हुने र सफलताका लागि सबैले सँगै मिलेर जानु पर्ने बताएका छन् ।

हामी सबै अलग छौं । हरेक चिजलाई हेर्ने र व्यवहार गर्ने आ आफ्ना शैली छन्, काभानीले भनेका छन्, तर जति बेला हामी मैदानमा हुन्छौं, सबैले सँगै मिलेर काम गर्नुपर्दछ । हामी एउटै परिवार हौं । हाम्रो उद्देश्य भनेको टोलीलाई जित दिलाउनु हुनेछ ।

उनाइ इमरीको टोलीले सिजनको सुरुआत उच्च प्रदर्शनबाट गरेको छ । नेयमार र काभानी दुवै उच्च फर्ममा देखिएका छन् । आउने दिनमा असमझदारीलाई अझै कम गर्दै दुवैले टोलीलाई लिग १ र च्याम्पियन्स लिग उपाधि दिलाउन महत्वपूर्ण भूमिका खेल्ने प्रशिक्षक इमरीले विश्वास लिएको बताइएको छ ।