काठमाडौं (हाम्रो खेलकुद) – साफ यू १८ च्याम्पियनसिप विजेता टोली आज स्वदेश फर्केको छ । अखिल नेपाल फुटबल संघ (एन्फा) पदाधिकारीले च्याम्पियन युवा टोलीलाई त्रिभुवन अन्तर्राष्ट्रिय विमानस्थलमा स्वागत गरेका थिए ।

भुटानमा सम्पन्न प्रतियोगिताको अन्तिम दिनका दुवै खेलमा अनकुल आएपछि नेपालले उपाधि रक्षा गरेको हो । दुई बर्षअघि नेपालले घरेलु मैदानमा आयोजित पहिलो साफ यू १९ को उपाधि जितेको थियो । राउन्ड रोविनको अन्तिम खेलमा बुधबार भारतलाई २–० ले हराएपछि नेपाल विजेता बनेको हो ।

त्यसअघि बंगलादेशले नेपालका लागि उपाधि जित्ने बाटो तयार पारिदिएको थियो । नेपाल र भारतको खेलअघि बंगलादेशले भुटानलाई २–० ले हराएपछि नेपालको उपाधि जित्ने सम्भावना बनेको थियो । यदि त्यो खेल भुटानले जित्यो भने अन्तिम खेलअघि नै नेपाल उपाधि दौडबाट बाहिरिसक्ने थियो । सहभागी पाँच टोलीमा राउन्ड रोविनपछि सर्वाधिक अंक प्राप्त गर्ने टोली विजेता भएको हो ।

नेपाल र बंगालदेशको बराबरी ९ अंक भएमा हेड टु हेडका आधारमा नेपाल विजेता बनेको हो । पहिलो खेलमा भुटानसँग पराजित नेपाललले बाँकी सबै खेल जितेको थियो । नेपालसँग हारेको बंगलादेशले बाँकी टोलीलाई पराजित गरेको थियो ।

भारतलाई हराउन दुवै गोल दिनेश हेन्जनले गरेका थिए । फ्रिकिकमा आएको बललाई वन टचमा दिनेशले दोस्रो मिनेटमा गोल गरे । उनले नै ३७ औं मिनेटमा पेनाल्टी बक्स भित्रबाट राम्रो गोल गर्दै अग्रता दोब्बर पारेपछि नेपाल बलियो अवस्थामा पुगेको थियो । दिनेशले सिक्स यार्ड बक्सको दाँया तर्फबाट फार पोस्टमा भारतीय गोलकिपरलाई बिट गर्दै गोल गरेका थिए । दिनेश नै प्रतियोगिताको सर्वोत्कृष्ट खेलाडी पनि चुनिएका थिए ।