मस्को (एजेन्सी) – च्याम्पियन्स लिगको समूह एमा शतप्रतिशत नतिजा कायम राख्दै म्यानचेस्टर युनाइटेडले सिएसकेए मोस्कोमाथि ४-१ को सहज जित दर्ता गरेको छ । युनाइटेडका लागि रोमेलु लुकाकुले दुई गोल गरे भने एन्थोनि मार्सियाल र हेनरिक मिखितार्यानले एकएक गोल गरे ।

चौथो मिनेटमै लुकाकुमार्फत खेलमा अग्रता लिएको युनाटेडका लागि मार्सियालले १८ औँ मिनेटमा पेनाल्टीमार्फत अग्रता दोब्बर बनाएका थिए । त्यस्तै २६ औँ मिनेटमा फेरी लुकाकुले गोल गर्दै पहिलो हाफमै स्कोर ३-० बनाए ।

एभर्टनबाट युनाइटेड आएयता त्यो लुकाकोको १० औँ गोल थियो । यसै गरी मिखितार्यानले ५७ औँ मिनेटमा गोल गर्दै घरेलु टोलीलाई निराश बनाए । सिएसकेए मोस्कोले खेलको अन्तिम समयतिर कन्सटान्टिन कुचायबमार्फत एक सान्तवना गोल हात पारेको थियो ।

त्यस्तै अर्को इङ्ग्लिस टोली चेल्सीले एट्लेटिको म्याड्रिडसँग २-१ को रोमञ्चक जित हात पार्‍यो । घरेलु मैदानमा एन्टोनियो ग्रिजम्यानले ४० औँ मिनेटमा एट्लेटिकोलाई पेनाल्टीमार्फत अग्रता दिलाएका थिए ।

तर एल्भारो मोराटाको ५९ औँ मिनेटको गोलमा चेल्सी खेलमा फर्केको थियो । त्यसपछी खेलको चौथो मिनेटको इन्ज्युरी समयमा मिची ब्याटसुवायीले गोल गर्दै चेल्सीको रोमाञ्चक जित सुनिश्चित गरेका थिए । जितसँगै म्यानचेस्टर युनाइटेड र चेल्सी आआफ्ना समूहमा अग्रस्थानमा उक्लेका छन् ।

गए राति च्याम्पियन्स लिग खेलका अन्य नतिजाहरु –

बासेल ५-० बेनिफिका

युभेन्टस २-० ओलम्पियाकोस

काराबग १-२ रोमा

स्पोर्टिङ ०-१ बार्सिलोना

एन्डरलेक्ट ०-३ सेल्टिक

पिएसजी ३-० बायर्न म्युनिख