नेपाल उपाधि नजिक : पहिलो हाफमा भारत विरुद्ध २-० को अग्रता

काठमाडौं (हाम्रो खेलकुद) – भुटानमा जारी साफ यू-१८ च्याम्पियनसिपको अन्तिम खेलको पहोलो हाफ सकिदा नेपाल भारतविरुद्ध २-० को अग्रतामा छ । नेपालका लागि दुवै गोल दिनेश हेन्जनले गरेका हुन् ।

फाइल तस्विर : एनएसजेएफ

नेपालले खेलको पहिलो मिनेटमा अग्रता लिएको थियो । फ्रिकिकमा दिनेशले टच गर्दै नेपाललाई अग्रता दिलाएका थिए भने ३७ औं मिनेटमा हेन्जनले बक्स भित्रबाट राम्रो गोल गर्दै अग्रता दोब्बर गरेका थिए । दिनेशले ६ यार्ड बक्सको दाँया तर्फबाट फार पोस्टमा भारतीय गोलकिपरलाई बिट गरेका थिए ।

भारतले खेलमा गोल गर्ने थुप्रै प्रयास गरेपनि गोल गर्न भने सकेको छैन । यसअघिको खेलमा बंगलादेशले घरेलु टोली भुटानलाई २-० ले पराजित गरेको थियो ।

बंगलादेशले तेस्रो जितसँगै ९ अंक बटुलेपछि भारतको भने उपाधि जित्ने सम्भावना सकिएको छ । बंग्लादेशले भारतलाई ४-३ ले पराजित गरेकाले भारतले ९ अंक बनाएपनि हेड टु हेडका आधारमा बंगलादेशले उपाधि जित्ने छ । तर अन्तिम खेलमा नेपालले भारतलाई पराजित गरेमा नेपाल हेड टु हेडका आधारमा च्याम्पियन बन्ने छ ।