लिस्बोन (एजेन्सी) – पाँच पटकको च्याम्पियन्स लिग विजेता बार्सिलोनाले आज राति समूह डिमा पोर्चुगेली क्लब स्पोर्टिङ सिपिको सामना गर्दै छ । स्पोर्टिङको घरेलु मैदानमा खेलिने यस खेल नेपाली समय अनुसार १२.३० बजे सुरु हुने छ ।

बार्सिलोनाले आफ्नो च्याम्पियन्स लिग अभियान युभेन्टसलाई ३–० ले हराउँदै सुरु गरेको गरेको थियो भने स्पोर्टिङले पनि आफ्नो पहिलो खेलमा ओलम्पियाकोसलाई ३–२ ले हराउन सफल रहेको थियो । ला लिगाको सिजनमा सबै ६ खेल जित्दै बार्सिलोना राम्रो लयमा देखिएको छ । अर्को तर्फ स्पोर्टिङको भने पछिल्ला २ खेल बराबरीमा टुङिएको छ ।

बार्सिलोनाका लागि ओस्माने डेम्बेले लामो समयका लागि चोटिल छन् । त्यसैले जेरार्ड डेउलेफेउले लियोनल मेस्सी र लुइस स्वारेजलाई अग्रपंक्तिमा साथ दिने छन् । मिडफिल्डमा भने आन्द्रेस इनिएस्टाको साथ सर्जियो बुस्केट्स र पौलिन्होले दिने सम्भावना छ ।  राम्रो लयमै रहेकाले आफ्नो सुरुवाती ११ मा बार्सिलोनाले खासै हेरफेर नगर्ने देखिन्छ ।

स्पोर्टिङका लागि भने लगभग सबै खेलाडि फिट रहेका छन् । एलेन रुइज शनिबारको घरेलु खेलमा चोटिल भएकाले उनी आज राति नखेल्ने सम्भावना छ ।

दुवै टोली अाअफ्ना सिजनको राम्रो सुरुवातलाई निरन्तरता दिन खोज्ने छन् । स्पोर्टिङले यस सिजन बार्सिलोना जस्तै एउटा पनि खेल गुमाएको छैन् । बार्सिलोनाले स्पोर्टिङ विरुद्ध पछिल्ला दुई खेलमा दुवै जित्दै कुल आठ गोल पनि गरेको छ ।