पेरिस (एजेन्सी) – च्याम्पियन्स लिग समूह बि अन्तर्गत आज राति दुई उपाधि दाबेदार बायर्न म्युनिख र पेरिस सेन्ट जर्मन (पिएसजी) भिड्दै छन् । खेल आज राति नेपाली समयअनुसार १२.३० बजे सुरु हुने छ ।

पिएसजीले आफ्नो पहिलो खेलमा सेल्टिकलाई ५–० ले हराएको थियो बने बायर्न एन्डरलेक्टसँग ३–० ले विजयी रहेको थियो । पिएसजी र बायर्न बीचको यो खेल समूह ईको विजेताको छिनोफानो लगाउन पछी निकै महत्त्वपूर्ण सावित हुन सक्छ ।

पिएसजीका लागि लिगमा मोन्टपिलेरसँग नखेलेका नेयमार टोलीमा फर्कँदै छन् भने एन्जेल डि मारिया पनि उपलब्ध हुने छन् । मिडफिल्डर जाभियर पास्टोरे भने चोटिल रहेकाले खेलमा सहभागी हुने छैनन् ।

बायर्नलाई भने आफ्नो घाइते रहेका गोलकिपर म्यानुयल नोयाको अभाव खड्किने छ । चोटिल रहेका डेभिड अलाबा खेल्न अनिश्चित छन् तर प्रतिबन्धमा परेका आर्टुरो भिडाल अहिले टोलीका फर्कँदै छन् ।

१७ वर्षपछि च्याम्पियन्स लिगमा भिडिरहेका बायर्न र पिएसजीले एकअर्काको सामन केवल दुई चोटी गरेका छन् । त्यसमा बायर्न र पिएसजीको एकएक जित रहेको छ ।

सन् २०१२–१३ को च्याम्पियन्स लिग विजेता रहेको बायर्नले पछिल्ला ७ वर्षमा हरेक पटक कम्तिमा क्वाटरफाइनलसम्म पुगेको छ । त्यस्तै थुप्रै पैसा खर्च गरेर टोली सम्मिलित गरेकाले पिएसजीलाई पनि यस वर्षको दाबेदार मानिएको छ ।