एपिएफले दुधे गोल्ड कपको फाइनलमा चर्च ब्वाइजको सामना गर्दै

सबिन शेर्मा
झापा – टुबोर्ग प्रथम दुधे गोल्ड कप फुटबल प्रतियोगिताको फाइनल आज हुँदैछ । उपाधिका लागि ए डिभिजन क्लब नेपाल एपिएफले चर्च ब्वाइज काठमाडौंको सामना गर्नेछ । विजेताले उपाधिसहित ३ लाख १ हजार रुपैयाँ पाउनेछ । दोस्रो हुने टोलीले १ लाख ५१ हजार रुपैयाँ प्राप्त गर्नेछ ।

फाइनल पुग्ने दुई टोलीको सेमिफाइनलमा प्रतिस्पर्धा फरक खालको रह्यो । एपिएफले हिमालयन शेर्पालाई प्रतिस्पर्धात्मक खेलमा २–१ ले हराएको थियो । खेलमा पछि परेर पनि एपिएफ नतिजा उल्टाउन सफल भएको थियो । अर्कोतर्फ चर्च ब्वाइजले भने मोरङ ११ माथि ४–० को सहज जित निकालेको थियो ।

झापाको शिवशताक्षी नगरपालिकाको दुधे क्लबले आयोजना गरेको प्रतियोगिताको सर्वोत्कृष्ट खेलाडी र उच्च गोलकर्ताले जनही २५ हजार रुपैयाँ प्राप्त गर्नेछन् । असोज ४ गते सुरु भएको प्रतियोगितामा ८ टोलीको सहभागिता रहेको थियो ।