केर्खा स्टार झापा एकेडेमी फुटबलको उपाधि नजिक

भद्रपुर (हाम्रो खेलकुद)– केर्खा स्टार फुटबल एकेडेमी झापा जिल्ला एकेडेमी स्तरीय फुटबल प्रतियोगिताको फाइनलमा पुगेको छ । एपिएफ दमकलाई आज भएको सेमिफाइनलमा १–० ले हराउँदै केर्खा उपाधि नजिक पुगेको हो ।

अब कारकभिट्टा फुटबल एकेडेमी र सैनिक युवा क्लबको विजेतासँग केर्खाले फाइनल खेल्नेछ । मेची रंगशालामा भएको सेमिफाइनलमा रोशन दनुवारको गोलबाट केर्खाले ५० औं मिनेटमा खेलमा अग्रता लिएको थियो । त्यहि अग्रता जोगाउन सफल हुँदै केर्खा अन्तिम दुईमा पुगेको हो ।

५९ औं मिनेटमा एपिएफले खेल बराबरीको अवसर पाएपनि सदुपयोग गर्न सकेन । उसले पेनाल्टीमा गोल गर्न नसक्दा बराबरीको अवसर गुमेको थियो । केर्खाका गोलकिपर ओमन लामा खेलको म्यान दफ दी म्याच घोषित भए । उनलाई फुटबलका वरिष्ठ प्रशिक्षक भगिरथ आलले ट्रफी प्रदान गरे ।

प्रतियोगितामा सोमबार कारकभिट्टा र सैनिक युवाबीच दोस्रो सेमिफाइनल हुने प्रतियोगिता आयोजक समितिका संयोजक युगल किशोर राईले जानकारी दिए । मुनाल क्लब भद्रपुरद्धारा सञ्चालित चन्द्रगढी फुटबल एकेडेमीको आयोजनमा सञ्चालित प्रतियोगिताको विजेताले उपाधिसहित १ लाख १ हजार र दोस्रो हुने टोलीले ५१ हजार रुपैयाँ प्राप्त गर्नेछ ।