काठमाडौं (हाम्रो खेलकुद) – एएफसी यु-१६ च्याम्पियन्सिप छनोट चरणअन्तर्गत एपीएफको हलचोकस्थित रंगशालामा नेपाल प्यालेस्टाइन विरुद्ध भिड्दै छ । पहिलो हाफसम्म राम्रो प्रदर्शन गरिरहे पनि नेपालले १-१ को बराबरी खेलिरहेको छ ।

पेनाल्टी मार्फत अग्रता दिलाएका बिर्जेश चौधरी । उनले भारतविरुद्धको खेलमा पनि दुई गोल गरेका थिए । तस्विर : विवेक सुवेदी

खेलको सुरुआतदेखि नै नेपाल आक्रामक रुपमा प्रस्तुत भएको हो । खेलको नवौँ मिनेटमा प्यालेस्टाइनका डिफेन्डर मुआथ बारहाउसले अाकाश बुढा मगरलाई लडाएपछि नेपालले पेनाल्टी पाएको थियो । सो पेनाल्टी भारतसँग दुई गोल गरेका बिर्जेश चौधरीले आरामसँग गोलमा परिणत गरेका थिए ।

त्यस्तै खेलको २८ औँ मिनेटमा प्यालेस्टाइनले नेपाली डिफेन्सलाई बिट गर्न सफल भएका थिए । मिडफिल्डबाट आएको पास सदुपयोग गर्दै महमोद रिदातले गोलकिपर विशाल सुनारलाई छक्याए र बललाई पोस्टको दिशा दिएका थिए ।

नेपाल र प्यालेस्टाइन दुवै टोलीले खुलेर खेल्दै थुप्रै अवसरहरु सिर्जना गर्न सफल भएका छन् । तर दुवै टोलिका गोलकिपरहरुले राम्रो बचाऊहरु गर्दै पहिलो हाफको अन्त्यसम्म खेललाई १-१को स्कोरमा रोकेका छन् ।

समूहको पहिलो खेलमा नेपाल इराकसँग १-० ले हारेको थियो भने दोस्रो खेलमा भारतसँग २-२ को बराबरी खेलेको थियो । त्यस्तै पहिलो खेलमा भारतसँग ३-० ले हारेको प्यालेस्टाइनले दोस्रो खेलमा इराकसँग ४-० को हार बेहोरेको थियो । यस अघिको खेलमा इराक र भारतले गोलरहित बराबरी खेलेसँगै नेपालको छनोटको सम्भावना समाप्त भएको थियो । प्यालेस्टाइन भने दुई हार बेहोर्दै पहिले नै बाहिरिसकेको थियो ।