केर्खा स्टार झापा एकेडेमी फुटबलको सेमिफाइनलमा

भद्रपुर (हाम्रो खेलकुद)– केर्खा स्टार फुटबल क्लब झापा जिल्ला ऐकेडेमी स्तरीय नकआउट फुटबल प्रतियोगिताको सेमिफाइनलमा पुगेको छ । आयोजक चन्द्रगढी फुटबल एकेडेमीलाई टाइब्रेकरमा ४–३ ले हराउँदै केर्खा अन्तिम चारमा पुगेको हो । निर्धारित समय १–१ को बराबरीमा टुंगिएको खेलमा टाइब्रेकरमा केर्खा स्टार विजयी भएको थियो ।

चन्द्रगढीले पहिलो हाफमा लिएको अग्रता जोगाउन नसक्दा पेनाल्टी सुटआउटमा हार्नु परेको थियो । आठौं मिनेटमा सविन मगरको गोलबाट चन्द्रगढीले अग्रता लिएको थियो । तर, इन्जुरी समयमा केर्खाका लागि दीपेश मगरले बराबरी गोल गरेका थिए । विश्वास श्रेष्ठले रातो कार्ड पाएपछि दोस्रो हाफमा चन्द्रगढी १० खेलाडीमा सिमित भएको थियो ।

खेलमा चन्द्रगढीका राम मार्दी खेलको म्यान अफ दी म्याच घोषित भए । मुनाल क्लब भद्रपुरद्धारा सञ्चालित चन्द्रगढी फुटबल एकेडेमीको आयोजनमा सञ्चालित प्रतियोगिताको विजेताले उपाधिसहित १ लाख १ हजार र दोस्रो हुने टोलीले ५१ हजार रुपैयाँ प्राप्त गर्नेछ । भोली काकरभिट्टा एकेडेमी र रानी पुलिस क्लब विराटनगरबीच प्रतिस्पर्धा हुने प्रतियोेगिता संयोजक युगलकिशोर राईले जानकारी दिए ।