काठमाडौं (हाम्रो खेलकुद) – एएफसी यू-१६ च्याम्पियनसिप अन्तर्गत छनोट चरणको खेलमा नेपाल र भारतले पहिलो हाफमा गोलरहित बराबरी खेलेका छन् । दुवै टोलीले राम्रो अवसर पाएपनि गोल गर्न भने सकेनन् ।

तस्विर : विवेक सुवेदी / हाम्रो खेलकुद

पहिलो खेलमा इराकसँग १-० ले पराजित नेपालले भारतसँगको खेलमा राम्रो सुरुआत गर्यो । पाँचौ मिनेटमा नेपालले खेलको पहिलो कर्नर पाएको थियो । रन्जन पुनको कर्नरमा बिर्जेश चौधरीको प्रहार क्रसबारमाथिबाट बाहिरियो ।

भारतले १४ औं मिनेटमा गोल अग्रता लिने अवसर पाएपनि भारतीय कप्तान विक्रम प्रताप सिंहको ८ यार्ड नजितको प्रहार गोलकिपर बिशाल सुनारले ब्लक गरे । नेपालले आकाश बुढा मगरले सुरु गरेको काउन्टर एट्याकमा राम्रो मौका सिर्जना गरेपनि कप्तान रोशन राना मगरले उनको थ्रु बल नियन्त्रणमा लिन नसकेपछि राम्रो अवसर गुमाएको थियो ।

भारतले २४ औं मिनेटमा कर्नर मार्फत गोल गर्ने राम्रो अवसर गुमायो । बिके ओरामको कर्नरमा मोइराइङ्गथेम थोइबा सिंहको हेडर क्रसबार नाजिकबाट बाहिरिएको थियो । त्यसपछि २७ औं मिनेटमा नेपालका लागि रन्जन पुनको कर्नरमा रन्दिप पौडेलको हेडर पनि क्रसबार नाजिकबाट बाहिरियो ।

नेपाली गोलकिपर बिशालले २९ औं मिनेटमा लालछानहिमा साइलोको प्रहारमा उत्कृष्ट बचाउ गर्दै भारतलाई अग्रता लिनबाट रोके । त्यस्तै ४१ औं मिनेटमा दर्शन गुरुङको करिब ३० यार्डको फ्रीकिकलाई भारतीय गोलरक्षक लालबिआकलुआ जोङ्तेले रोकेका थिए ।