काठमाडौं (हाम्रो खेलकुद)– नेपाली राष्ट्रिय फुटबल टोली पूर्व कप्तान तथा फिफा रेफ्री स्वर्गिय रुपकराज शर्माको स्मृतिमा शनिबार साइक्लिङ प्रतियोगिता हुने भएको छ । आयोजक रुपक मेमोरियल फाउन्डेसनले पाकिस्तानी एयरलाइन्स दुर्घटना भएको २५ औं वार्षिकोत्सवको अवसर पारेर विमान दुर्घटनामा निधन भएकाहरुलाई श्रद्वान्जली दिने उद्देश्यले साइक्लिङ प्रतियोगिता गर्न लागेको बताइएको छ ।

२४ किलोमिटरको साइक्लिङ सातदोबाटोस्थित रुपकराज शर्माको स्मृतिमा निर्मित भवनबाट सुरु भएर ललितपुर लेलेस्थित पिआईए स्मृति पार्कमा पुगेर टुंगिनेछ । साइक्लिङमा १ सय ५० भन्दा बढी राइडरहरुको सहभागिता रहने बिहीबार आयोजित पत्रकार सम्मेलनमा जानकारी दिइइो ।पिआईए स्मृति पार्कमा पुगेपछि विमान दुर्घटनामा निधन भएकाहरुलाई सम्झदै मैनबत्ती बाल्ने कार्यक्रम रहेको छ । त्यसपछि पुन साइकल राइडरहरु सातदोबाटोमा आउने बताइएको छ ।

साइक्लिङको दौरान विमान दुर्घटना र यसको रोकथामबारे अन्तरक्रिया पनि हुनेछ । अन्तरक्रियामा हवाई विज्ञहरुको उपस्थिति रहने समेत फाउन्डेसनका सचिव क्रिश्मा शर्माले बताइन् । स्वर्गिय शर्मा छोरी समेत रहेकी सचिब क्रिश्माले भनिन्, ‘हवाई असुरक्षा अहिले पनि बढी रहेको छ, त्यसैलाई कसरी सुरक्षित बनाउने भन्ने उद्देश्य र हवाई सुरक्षाबारे जनचेतना फैलाउन साइक्लिङको आयोजना गरेका हौ ।’

साइक्लिङमा विभिन्न समयमा विमान दुर्घटनामा पारी ज्यान गुमाएकाहरुका परिवारहरुको समेत सहभागिता रहने बताइएको छ । ललितपुरस्थित भट्टेडाँडामा सन् १९९२ को सेप्टेम्बरमा भएको पाकिस्तानी एयरलाइन्सको विमान दुर्घटनामा पुर्व कप्तान तथा फिफा रेफ्री शर्माको निधन भएको थियो । दुर्घटनामा शर्मासहि १ सय ६७ जना यात्रुहरुको मृत्यु भएको थियो । उक्त दुर्घटना विमान दुर्घटनाको सयौ दुर्घटना समेत रहेको थियो । विस २०३० देखि २०४२ सम्म नेपाली राष्ट्रिय टोलीका कप्तान रहेका शर्मा २०४३ सालमा नेपालको पहिलो फिफा रेफ्री बनेका थिए ।