म्यानचेस्टर (एजेन्सी) – ईएफएल कपको तेस्रो राउन्डमा गए राति म्यानचेस्टर युनाइटेडले बर्टनमाथि ४-१ को सजिलो जित दर्ता गरेको छ । युनाइटेडको जितमा फरवार्ड मार्कोस रासफोर्डले दुई गोल गरेका थिए ।

म्यानचेस्टर युनाइटेडले बलियो सुरुवात गर्ने क्रममा रासफोर्डले पांचौँ र १७ औँ मिनेटमा गोल गरेका थिए । जेस्से लिनगार्डको अर्को गोलको मद्दतले घरेलु टोलीको पहिलो हाफमै जित पक्का जस्तै भएको थियो । त्यस्तै रासफोर्डकै पासको सदुपयोग गर्दै एन्थोनी मार्सियालले खेलको चौथोगोल गरे । बर्टनका लागि लोयड डायरको इन्ज्युरी मिनेटमा सान्तवना गोल थपेका थिए ।

त्यसैगरी मिची ब्याटसुवायीको ह्याट्रिकको मद्दतले चेल्सीले नोटिङहाम फरेस्टलाई ५-१ ले हरायो । चेल्सीका लागि अन्य गोल २० वर्षे फरवार्ड चार्ली मुसोन्डा र रोबर्ट केनेडीले गरेका थिए । नोटिङहाम फरेस्टले पनि इन्ज्युरी समयमा एक सान्तवना गोल हात पारेको थियो ।

आर्सनल र म्यानचेस्टर सिटी पनि आफ्ना खेलहरुमा विजयी रहे । थियो वाल्कटको एक मात्र गोलको मद्दतले आर्सनलले डोन्कास्टरलाई १-० ले हराउन सफल रह्यो भने म्यानचेस्टर सिटीको प्रिमियर लिग टोली वेस्ट ब्रोम माथिको जितमा विङ्गर लेरोय सानेले २ गोल गरे । क्लाउडियो याकोबले वेस्ट ब्रोमका लागि एक गोल गरेका थिए ।

मङ्गलबार रातिको खेलमा प्रिमियर लिगको अर्को शीर्ष ६ को टोली टोटनह्याम हटस्पर पनि बार्न्सलीलाई १-० हराउन सफल रहेको थियो । टोटनह्यामका मिडफिल्डर डेले अल्लीले खेलको निर्णायक गोल गरेका थिए ।

शीर्ष ६ टोलीमध्ये तेस्रो राउन्डबाटै बाहिरिनेमा लिभरपुल मात्र पर्यो । लिभरपुलले मङ्गलबार लेस्टरसँग २-० ले हारेको थियो । लेस्टरका लागि सिन्जी ओकाजाकि र इस्लाम स्लिमानीले गोल गर्दै लिभरपुललाई निराश पारेका थिए ।

तेस्रो राउन्डका अन्य नतिजाहरु :

ब्रेन्टफोर्ड १-३ नर्विच

वेस्ट ह्याम ३-० बोल्टन

बर्नली २-२ लिड्स (लिड्सको पेनाल्टीमा ५-३ को जित)

वुल्भ्स १-० ब्रिस्टोल रोवेर्स

एस्टन भिल्ला ०-२ मिडल्सब्रो

बोर्नमाउथ १-० ब्राइटन

क्रिस्टल प्यालेस १-० हडर्सफिल्ड

ब्रिस्टोल सिटी २-० स्टोक सिटी

रिडिङ ०-२ स्वान्सी सिटी

एभर्टन ३-० सन्डरल्यान्ड