काठमाडौं (हाम्रो खेलकुद) – इराकका प्रशिक्षक अली हादीले नेपालले डिफेन्सलाई ध्यान दिएको कारण धेरै गोल निकाल्न नसकेको बताए । नेपाली डिफेन्सलाई प्रसंसा गर्दै हादीले नतिजा प्रति सन्तुष्टी जनाए ।   

इराकका प्रशिक्षक

जितपछि हादीले नेपालले डिफेन्सलाई बढी जोड दिएर खेल्दा कम स्कोरमा चित्त बुझाउनु परेको बताए । ‘घरेलु टोलीसँग पहिलो खेल नै खेल्नु पर्दा हामीलाई केही गाह्रो भयो । १–० को जितमा पनि सन्तुष्ट नै छु ।’ प्रशिक्षक हादीले भने, ‘टिमको फरमेसन परिवर्तन गर्दा गोल निकाल्न सजिलो भयो । अर्काे खेलमा यो भन्दा राम्रो प्रदर्शन हुनेछ ।’ यस्तै प्रशिक्षक हादीले नेपाली टोलीले पनि राम्रो खेलेको प्रतिक्रिया दिए ।

यता नेपाली टिमका प्रशिक्षक सुनिल कुमार श्रेष्ठले खेलाडीहरुले आज शतप्रतिशत खेलेको बताए । उनले गोलरक्षक र डिफेन्डरले गल्ती गर्दा के हुन्छ त्यो देखिएको बताउदै त्यही नै नेपालको हारमा टर्निङ प्वाइन्ट भएको भएको बताए । ‘हामीले डिफेन्डिङ च्याम्पियनविरुद्ध तीन अंकको लागि नै खेलेका थियौ । तर, शुरुमा नै प्रेसरमा पर्दा खेल डिफेन्समा बढी केन्द्रित देखिएको हो ।’ प्रशिक्षक श्रेष्ठले भने, ‘इराकले पनि नेपाली पोष्टमा धेरै प्रहार गर्न सकेन । इराकसँग १–० ले पराजित भएपनि खेलाडीको मनोवल घटेको छैन । दोस्रो खेलमा अट्याकिङ खेल्नेछौं ।’

प्रशिक्षक सुनिल श्रेष्ठ

यस्तै प्रशिक्षक श्रेष्ठले समूह चरणको भारतविरुद्ध हुने खेल छनोटको लागि ‘गर या मर’ को खेल रहेको बताए । यसअघि नेपाल भारतसँग दुईपटक हारेपनि डोमिनेट नभई हारेको बताउदै भारतसँग उत्कृष्ट फुटबल खेल्ने बताए । नेपालले शुक्रबार भारतको सामना गर्नेछ ।