काठमाडौं (हाम्रो खेलकुद) – एएफसी यू-१६ च्याम्पियनसिप अन्तर्गतको छनोट चरणमा समूह ‘डी’ को पहिलो खेलमा भारतले प्यालेस्टाइनमाथि सहज जित हासिल गरेको छ । करिब तीन साताअघि नेपाली भूमिमा साफ यू-१५ च्याम्पियनसिपको उपाधि जितेको भारतीय टोलीले हल्चोक स्थित एपिएफको मैदानमा ३-० को सहज जित दर्ता गरेको हो ।

खेलमा पहिलो हाफदेखि नै हावी रहेको भारतकालागि दोस्रो हाफमा गिभ्सन सिंह मोइरंगथेम , बिके ओराम र कप्तान विक्रम प्रताप सिंहले गोल गरे । विक्रमले यसअघि साफ च्याम्पियनसिपको फाइनलमा नेपालविरुद्ध पनि गोल गरेका थिए ।

खेलको ५३ औं मिनेटमा अम्जद कोरानले भारतका विक्रमलाई लडाउँदा करिब २० यार्डबाट पाएको फ्रिकिकलाई गिभ्सनले सोझै गोलमा परिणत गर्दै भारतकालागि अग्रता दिलाएका थिए । पोस्टको बाँयाबाट गरेको लेफ्ट फुटेड प्रहारले फार पोस्टको दिशा पाएको थियो । त्यस्तै ओरामले ७४ औं मिनेटमा रिकी जोन सबोंगको क्रसमा हेड गर्दै गोल गरे ।  भारतका कप्तान विक्रमले ८२ औं मिनेटमा गोल गर्दै जित सुनिश्चित गरे ।

प्यालेस्टाइनका प्रशिक्षक याहे असी जालायाजाले आफ्नो टोलीले सोचे अनुरुप प्रदर्शन गर्न नसकेको बताए । ‘नेपालको मौसममा ढल्ने समय नपाउँदा खेलाडीहरुले अपेक्षा अनुरुप खेल्न सकेनन । हाम्रो सम्भावना अझ बाँकी रहेकोले अर्को खेलमा अझ राम्रो खेल्न प्रयास गर्नेछौं ‘ , जालायाजाले खेलपछिको पत्रकार सम्मेलनमा भने ।

त्यस्तै भारतीय प्रशिक्षक विभियानो फर्नान्डेजले खेलाडीको प्रदर्शनदेखि खुशी रहेको बताएका छन् । ‘हामीले प्रतिस्पर्धात्मक खेलको अपेक्षा गरेका थियौं तर दोस्रो हाफमा सहजै गोल निकाल्न सक्यौं ‘, उनले भने । त्यस्तै विभियानोले नेपालसँग साफमा दुइ पटक जितेपनि टोलीलाई अर्को खेलमा सहज नहुने बताए । ‘एकै टोलीलाई दुई पटक जित्दा अर्को खेलमा अझ गाह्रो हुन्छ । हामीले एक पछि अर्को खेलमा ध्यान दिनेछौं । नेपालसँगको खेल सहज हुने छैन  ‘,विभियानोले थपे ।

भारतले दोस्रो खेलमा शुक्रबार घरेलु टोली नेपालको सामना गर्नेछ भने प्यालेस्टाइनले इराकको  सामना गर्नेछ । आजको दोस्रो खेलमा नेपाल र इराक भिड्दै छन् ।