काठमाडौं (हाम्रो खेलकुद) – आर्सनल नेपालको पाँचौं वार्षिक साधारण सभा हिजो राजधानीमा सम्पन्न भएको छ । क्षेत्रपाटिस्थत मर्करी लाउन्जमा भएको सभामा आर्सनल नेपालले यो वर्षको टि सर्ट अनावरण गर्नुका साथै सदस्यता पनि वितरण गरेको थियो ।

सन् २००९ मा स्थापित आर्सनल नेपाल इङ्ल्यान्डको लण्डनस्थित आर्सनल फुटबल क्लबद्वारा मान्यता प्राप्त समर्थक क्लब हो । आफ्नो फेसबुक समूहमा २९ सय भन्दा बढी सदस्य रहेको आर्सनल नेपालले वर्षभरी फुटसल, साइक्लिङ र स्क्रिनिङ जस्ता अन्तरक्रियात्मक कार्यक्रमहरु गर्दै आएको छ ।

आर्सनल नेपालले सभामा अधिकारिक सदस्यहरुलाई सदस्यता कार्ड तथा टि सर्ट प्रदान गर्यो । आर्सनल नेपालका अधिकारिक सदस्यको संख्या २ सय नाघेको छ । अतिथिका रुपमा सहभागी आर्सनल समर्थक रहेकी मिस नेपाल एसिया पेसिफिक २०१७ साहारा बस्नेतलाई आर्सनल नेपालले यो वर्षको सम्मानित सदस्यता प्रदान गर्यो ।

आर्सनल नेपालका वर्षभरीका गतिविधिहरुका बारेमा भिडियो प्रस्तुत गर्नुका साथै आउने वर्षका योजनाहरु पनि कार्यक्रममा छलफल भएको थियो । पाँचौं अन्तर आर्सनल फुटसलका खेलाडीलाई प्रमाणपत्र बाँड्नुका साथै वर्षभरिका गतिविधिहरु आयोजना गर्न मद्दत गर्ने स्वयंसेवकहरुलाई सम्मान पत्र प्रदान गरियो । आर्सनल नेपालको इभेन्ट प्रायोजक ‘द जर्सी पसल’ र फुटसलका प्रायोजक ‘ज्याज अप्स्टेर्स’ लाई पनि कार्यक्रममा सम्मान गरिएको थियो ।

सभामा आर्सनल नेपालका अध्यक्ष नबिन चित्रकारले सहभागी सबैलाई धन्यवाद दिए । उनले भने ,’सबै जनाको साथ बिना केही पनि कार्यक्रम सम्भव छैन । वर्षभरीका विभिन्न गतिविधिहरुमा संलग्न भई साथ दिनुहुने सबै सदस्य, समर्थक, प्रायोजक र स्वयंसेवकहरुलाई विशेष धन्यवाद दिन चाहन्छु ।’