भद्रपुर (हाम्रो खेलकुद)– सैनिक फुटबल ट्रेनिङ सेन्टर झापा जिल्ला एकेडेमी स्तरीय नकआउट प्रतियोगिता क्वार्टरफाइनलमा पुगेको छ । मेची रंगशालामा हिजो उद्घाटन खेलमा दमक फुटबल क्लबलाई ६–२ ले हराउँदै सैनिक अघिल्लो चरण पुगेको हो ।

अब सैनिकले पहिलो चरणमा बाई पाएको जिबी रबर एमएफसीसँग बिहीबार प्रतिस्पर्धा गर्नेछ । प्रतियोगितामा आज केर्खा स्टार र जलथल एफएबीच प्रतिस्पर्धा हुनेछ ।

हिजोको खेलमा पहिलो हाफ २–२ को बराबरी भएको थियो । सैनिकका लागि विकेश लिम्बुले ह्याट्रिक पुरा गरेका थिए । ११ औं मिनेटमा पहिलो गोल गरेका विकेशले २३ औं मिनेटमा नेपाल्टीमार्फत गोल गरेका थिए । उनले ७० औं मिनेटमा गोल गर्दै ह्याट्रिक पुरा गरेका थिए ।

टोलीका लागि विशान राईले ५१ औं र ५७ औं तथा बालकृष्ण राईले ४१ औं मिनेटमा गोल गरेका थिए । दमकका लागि योगेन लिम्बुले २३ औं मिनेटमा गोल गरे । सैनिकका निश्चिल लिम्बुले आत्मघाती गोल गरेका थिए । मुनाल क्लब भद्रपुरद्धारा सञ्चालित चन्द्रगढी फुटबल एकाडेमीको आयोजनामा सुरु भएको प्रतियोगिताको उद्घाटन झापा जिल्ला समन्वय समितिको अध्यक्ष सोम पोर्लेलले गरेका थिए ।

प्रतियोगिताका संयोजक युगल किशोर राईको अध्यक्षतामा भएको उदघाटनमा झापा जिल्ला खेलकुद विकास समितिका अध्यक्ष शंकर थापा, भद्रपुर नगरपालिकाका प्रमुख जीवनकुमार श्रेष्ठ, संघिय प्रहरी इकाई भद्रपुरका एसएसपी पिताम्बर अधिकारीलगायतको उपस्थिति थियो ।

असोज ११ गते सम्म चल्ने प्रतियोगितामा १० वटा एकेडेमकिो सहभागिता रहेको छ । झन्डै १० लाख रुपैयाँ खर्च हुने अनुमान गरिएको प्रतियोगिताको विजेताले उपाधिसहित १ लाख १ हजार र दोस्रो हुने टोलीले ५१ हजार रुपैयाँ प्राप्त गर्नेछ ।