लण्डन (एजेन्सी) – लण्डनका दुई प्रिमियर लिगका उपाधि दाबेदार टोली चेल्सी र आर्सनलले स्ट्यामफर्ड ब्रिजमा गोलरहित बराबरी खेलेका छन् । खेलको अन्तिम समयतिर चेल्सीका रक्षक डेभिड लुइजले रातो कार्ड पाएपछि चेल्सीले खेल १० खेलाडिमा सकाएको थियो ।

आर्सनलले खेलमा राम्रो सुरुवात गर्दै पहिलो हाफमा पकड जमाएको थियो । आर्सनलका आरोन राम्जीले रक्षकहरुलाई छक्याउँदै ४३ औँ मिनेटमा गरेको प्रहार गोलपोस्टमा लागेको थियो । त्यस्तै चेल्सीका लागि पेड्रोले पहिलो हाफको सबैभन्दा राम्रो अवसर पाएका थिए ।

आर्सनलका गोलरक्षक पिटर चेकसँगको एक-विरुद्ध-एकको मौका उनले बललाई राम्ररी नियन्त्रण लिन सक्दा गोल गर्नबाट चुकेका थिए । दोस्रो हाफमा भने खेलमा फर्कँदै चेल्सीले खेललाई नियन्त्रणमा लिएको थियो । बेन्चबाट मैदान भित्रिएका एडेन हाजार्डको कडा प्रहारलाई पिटर चेकले सजिलैले छेकेका थिए । आर्सनलका स्कोड्रान मुस्ताफीको हेडर गोललाई रेफ्रिले सहि ढङ्गमा अफसाइड पनि दिएका थिए ।

खेलको अन्तिम समयतिर भने डेभिड लुइजले सिड कोलासिनाचमाथि गरेको खराब ट्याकल बापत उनले रेड कार्ड पाएका थिए । त्यसपछि चेल्सीले खेलको अन्तिम पाँच मिनेट १० खेलाडिमै सीमित भई खेलेको थियो । यस नतिजासँगै चेल्सी १० अंकसहित तेस्रो स्थानमा छ भने पाँच खेलमा सात अंक बटुल्दै आर्सनल भने तालिकाको बाह्रौँ स्थानमा छ ।