आयोजक भगवतीलाई गजराज कप उपाधि

काठमाडौं (हाम्रो खेलकुद) – आयोजक श्री भगवती क्लब टोखा प्रथम उत्तर भेगीय गजराज जोशी कप फुटबल प्रतियोगिताको उपाधि जिततेको छ । टोखाकै अर्को क्लब सिटी स्पोर्टस क्लबलाई शनिबार ३-० ले हराउँदै भगवतीले उपाधि जितेको हो ।

टोखास्थित फुटबल मैदानमा खेलको सुरुवातदेखि नै भगवतीले दबदबा राखेको थियो । भगवतीका लागि हरि कार्कीले खेलको ३४ औ, सन्तोष श्रेष्ठले दोस्रो हाफको १३ औं र श्याम नेपालीले दोस्रो हाफको १९ औ मिनेटमा गोल गरे ।

प्रतियोगितामा सर्वश्रेष्ठ खेलाडी सीटीका सोनम श्रेष्ठ घोषित हुदा सर्वाधिक गोलकर्ता सदावहार खेलकुदका दीपेश श्रेष्ठ बने । त्यस्तै सर्वोत्कृष्ठ गोलकिपर भगवतीका राजु नगरकोटी, वेष्ट मिडफिल्डर भगवतीका राजु कुमाल र वेष्ट डिफेन्डर बाँनियाटार युवा समाजका सुदन लामा घोषित भए ।

विजयी टोली भगवतीले उपाधिसहित एक लाख रूपैयाँ प्राप्त गर्यो । विजेता खेलाडीहरुलाई काँग्रेस महामन्त्री शशांक कोइरालाले पुरस्कार तथा ट्रफी वितरण गरे । काठमाडौंको उत्तर भेगका २० टोलीको सहभागिता रहेको प्रतियोगिता लिगको आधारमा सञ्चालन गरिएको हो ।