दिपक बोहोरा
पाँचथर– खेल मैदानको बजेट ‘फ्रिज’ भएपछि त्यसको दोष जिल्ला खेलकुद विकास समिति पाँचथर र फिदिम उच्च माविबीचले एकअर्कालाई दिन थालेका छन् । फिदिम उमाविको स्वामित्वमा रहेको खेल मैदानको मर्मतको लागि छुटिएको बजेट १० लाख रुपैयाँ काम हुन नसकेर फ्रिज भएको छ ।

अहिले फ्रिज हुनुको दोष दुई पक्षले एकअर्कालाई लगाउने गरेका छन् । जिल्ला खेलकुद समिति मार्फत सञ्चालन गर्ने गरी प्राप्त रकमबाट खेल मैदानको स्तर उन्नती गर्न सकिने रकम काममै नगरी फिर्ता भएको हो । आर्थिक वर्ष २०७३÷०७४ मा मैदान मर्मतका लागि बजेट विनियोजन भएको थियो ।

जिल्ला खेलकुद विकास समितिकी अध्यक्ष बाबा मेन्याङबोले फिदिम माविले चासो नदिदा बजेट फ्रिज भएको आरोप लगाइन् । ‘सुरुमा ५ लाख रुपैयाँ बजेट रहेकोमा आफैले पहल गरेर १० लाख बनाईयो तर काम हुन सकेन,’ मेन्याङबोलले भनिन्, ‘फिदिम बजार क्षेत्रमा रहेको एकमात्र खेलमैदान बनाउन सकिएन । फिदिम माविको जग्गा भएपनि उहाँहरुले चासो देखाउनु भएन । बरु अन्यत्र बजेट लगाएको भए काम हुने थियो ।’
फिदिम उच्च माविका व्यवस्थापन समितिका अध्यक्ष रमेश प्रधानाङ्ग बजेट फ्रिज हुनुमा विद्यालय दोष रहेको मान्न तयार छैनन् । जिल्ला खेलकुद विकास समितिकै कारण बजेट फ्रिज भएको उनको आरोप छ । मैदानका लागि छुटिएको बजेट खर्च गर्न नसक्नु दुःखद भएको उनको गुनासो छ ।

‘सुरुमा खेलकुद विकास समितिलाई खेलकुद गतिविधिको स्वामीत्व दिन पर्ने गरी ५ लाखको सम्झौता गर्न पत्र आएको थियो । स्वामित्व दिने विषयमा विद्यालय तयार हुने कुरा भएन,’ प्रधानाङ्गले भने, ‘संसोधन गरेर सम्झौता गर्न आउन भन्यौ । उहाँहरु लामो समयसम्म आउनु भएन । आर्थिक बर्ष सकिन केहि दिनमात्र बाँकी रहँदा बजेट १० लाख रुपैया भएको भन्दै आउनु भयो । अन्तिम समयमा काम गर्न सक्ने अवस्था थिएन । ’

जिल्लाकै प्रतिष्ठित फाल्गुनन्द गोल्ड कप , पाँचथर गोल्ड कप जस्ता प्रतियोगिता आयोजना हुने मैदान मर्मतमा ध्यान नदिदा पहिलाभन्दा मैदानको स्वरुप कुरुप बन्दै गएको छ ।