वाटफर्ड (एजेन्सी) – प्रिमियर लिगमा फरवार्ड सर्जियो अगुइरोको ह्याट्रिकको मद्दतले म्यानचेस्टर सिटीले वाटफर्डलाई ६-० को फराकिलो गोल अन्तरले हराएको छ । यस जितसँगै म्यानचेस्टर सिटी अंकतालिकाको अग्रस्थानमा उक्लेको छ ।

खेलको २७ औँ मिनेटमा पहिलो गोल गर्दै अगुइरोले सिटीको गोलको खाता खोलेका थिए । त्यसको ४ मिनेटपछि नै उनले डेभिड सिल्भाको पासमार्फत सिटीको अग्रता दोब्बर बनाएका थिए । सिटीका अर्का फरवार्ड गाब्रियल जेससले ३७ औँ मिनेटमा अगुएरोकै पास सदुपयोग गर्दै स्कोर ३-० बनाएका थिए ।

दोस्रो हाफमा पनि सिटी थप तीन गोल थप्न सफल भएको थियो । डिफेन्डर निकोलस ओटामेन्डिले हेडरमार्फत चौथो गोल गरे भने खेलको ८१ औँ मिनेटमा सिटीको पांचौँ गोल गर्दै अगुइरोले आफ्नो ह्याट्रिक पनि पूरा गरेका थिए । खेलको अन्तिम समयतिर रहिम स्टेर्लिङ स्वयमले जितेका पेनाल्टीलाई गोलमा परिणत गर्दै सिटीको खेलको छैठौँ गोल गर्न सफल भए ।

त्यस्तै लिभरपुल भने आफ्नो घरेलु मैदानमा बर्नलीसँग १-१ को बराबरीमा रोकिन पुग्यो । स्कट आर्फिल्डले बर्नलीलाई खेलको २७ औँ मिनेटमा अग्रता दिलाए पनि मोहम्मद सालाले त्यसको तीन मिनेटमै गोल गर्दै लिभरपुललाई खेलमा फर्काएका थिए । त्यस पछि लिभरपुलले खेल आफ्नो पक्षमा पार्ने कैंयौँ प्रयास गरे पनि सो प्रयास विफल भएको थियो ।

अन्य खेलमा स्टेभेन डेभिसको गोलको मद्दतले साउथह्याम्पटन क्रिस्टल प्यालेसलाई १-० ले हराउन सफल रह्यो । यो हारसँगै प्यालेस सिजनका पाँच खेलमा अंकविहीन र गोलविहीन रहेको छ । वेस्ट ब्रोमले वेस्ट ह्यामसँग गोलरहित बराबरी खेल्यो भने हडर्सफिल्ड र लेस्टरको खेल पनि १-१ मा टुङ्गियो । न्युकासलले आफ्नो जितको यात्रालाई निरन्तरता दिँदै स्टोक सिटीलाई २-१ ले हराउन सफल भयो । हिजो रातिको प्रिमियर लिग खेलमा भने सिजनको पहिलो जित दर्ता गर्दै बर्नमाउथले ब्राइटनलाई २-१ ले हराएको थियो ।