वाटफोर्ड (एजेन्सी) – प्रिमियर लिगको अंकतालिकामा दोस्रो स्थानमा रहेको म्यानचेस्टर सिटी आज बेलुका वाटफोर्डको सामना गर्दै छ । सिजनमा बलियो सुरुवात गरेको वाटफोर्ड पनि तालिकाको चौथो स्थानमा रहेको छ ।

म्यानचेस्टर सिटीका कप्तान भिन्सेन्ट कम्पनी पिडौंलाको चोटबाट ठिक भइसके पनि आजको खेलमा सुरुवात भने नगर्ने सम्भावना छ । च्याम्पियन्स लिगमा फेयेनूर्डसँग ४-० को जितपश्चात प्रशिक्षक पेप गुवार्डियोलाले केहि खेलाडि हेरफेर गर्न सक्ने छन् । अर्को तर्फ वाटफोर्डका लागि मिडफिल्डर रोबेर्टो पेरेरा चोटपछि टोलीमा फर्किरहे पनि रक्षापंक्तिमा अझै धेरै खेलाडिहरु घाइते रहेका छन् ।

त्यस्तै गएसाता म्यानचेस्टर सिटीसँग ५-० ले हारेको लिभरपुल आज बर्नलीसँग एनफिल्डमा भिड्दै छ । बर्नलीले भने आफ्नो अघिल्लो खेलमा क्रिस्टल प्यालेसलाई १-० ले हराएको थियो । लिभरपुलका लागि साडियो माने सिटीसँग पाएको रेड कार्डपछि खेल्न प्रतिबन्धित छन् भने अर्का मिडफिल्डर फिलिप कौटिन्हो टोलीमा आगमन गर्ने सम्भावना रहेको छ । बर्नलीले पनि आफ्ना गोलरक्षक टम हिटनलाई चोटका कारण गुमाउने छन् ।

म्यानचेस्टर सिटी र लिभरपुल जस्तै उपाधि दाबेदार अर्को टोलि टोटनह्याम हटस्पर आज राति स्वान्सि सिटीलाई वेम्ब्लीमा निम्त्याउँदै छ ।एभर्टनसँगको अघिल्लो लिग खेलमा राम्रो लयमा देखिएको टोटनह्याम आफ्नो च्याम्पियन्स लिगमा बोरुसिया डर्टमन्ड माथिको ३-१ जितबाट ताजै रहेको छ ।

नेपाली समय अनुसार आजका सबै प्रिमियर लिग खेलहरु –

क्रिस्टल प्यालेस विरुद्ध साउथह्याम्पटन – ५.१५ बजे

हडर्सफिल्ड विरुद्ध लेस्टर सिटी – ७.४५ बजे

वेस्ट ब्रोम विरुद्ध वेस्ट ह्याम – ७.४५ बजे

लिभरपुल विरुद्ध बर्नली – ७.४५ बजे

वाटफर्ड विरुद्ध म्यानचेस्टर सिटी – ७.४५ बजे

न्युकासल विरुद्ध स्टोक सिटी – ७.४५ बजे