म्याड्रिड (एजेन्सी) – रियल म्याड्रिड र स्पेनिस मिडफिल्डर इस्कोबीच पाँच वर्षे सम्झौता भएपछि उनले रियल नछाड्ने पक्का भइसकेको छ । यो सिजनको अन्त्यसँगै इस्कोको सम्झौता सकिने भएकोले बार्सिलोना लगायतका क्लबले उनलाई प्रस्ताव गरेको खुलासा गरेका छन् ।

बिहीबार रियलसँग नँया सम्झौतामा पुगेका इस्कोलाई भित्राउन बार्सिलोना र म्यानचेस्टर सिटी इच्छुक थिए । ‘हो,केहि कुरा भएको थियो तर मैले कहिल्यै चासो दिएर सुनिन,’ इस्कोले भने,‘ मेरो लक्ष्य रियलको पहिलो रोजाइमा परेर उपाधि जित्नु हो ।’

प्रशिक्षक जिनेदिन जिदानले पहिलो दिनबाट आफ्नो हौसला बढाएको इस्कोले बताए । ‘जिदानले क्लब सम्हालेको पहिलो दिनमा म प्रति विश्वास रहेको बताएका थिए । यसले मेरो हौसला बढेको छ,’ उनले थपे,‘ हामीले आफ्नो मात्र नभएर सम्पूर्ण टिमको बारेमा सोच्न जरुरी छ ।’ रियल र इस्कोबीच लामो समयदेखि सम्झौता हुन सकेको थिएन ।

रियल चोटको समस्या बढे पछि प्रशिक्षक जिदानले ४–४–२ को फर्मेसन अपनाएपछि इस्कोले रियलको पहिलो रोजाइमा निरन्तर स्थान पाउँदै आएका छन् । ग्यारेथ बेलको चोटपछि टोलीमा निरन्तर स्थान पाएका उनले अवसरको सदुपयोग गर्ने क्रममा टोलीमा उच्च प्रदर्शन गरिरहेका छन् । मलागाबाट २०१३ मा रियलसँग आवद्ध इस्कोले गत सिजन ३० खेलमा १० गोल गरेका थिए ।