काठमाडौँ (हाम्रोखेलकुद)- युथ टिमको पहिलोपटक जिम्वेवारी सम्हालेका लक्ष्मी हुण्डाई मनाङ–मस्र्याङ्दी क्लबमा पूर्व प्रशिक्षक छिरिङ लोप्साङ गुरुङले टिमको तयारी सन्तोषजनक नरहेको बताएका छन् ।

युवा टोलीको शुक्रबार बिदाईं पछि प्रशिक्षक लोप्साङले टिमको तयारीप्रति यस्तो प्रतिक्रिया दिएका हुन् । ‘युथ टिमको जिम्मेवारी मेरो लागि अवसर र चुनौती दुवै हो । तर, टिमको तयारी सोचेअनुरुपको छैन ।’ प्रशिक्षक लोप्साङले भने, ‘हामी डिफेन्डिङ च्याम्पियन हौं । हामीसँग विगतमा जस्तै यसपटक एन्फा एकेडेमीमा खेलाडीको अभाव देखियो । खुल्ला र ललित स्मृति फुटबलबाट केही खेलाडी छान्यौ । तर, यो डेढ महिनाको समय खेलाडीको छनोट प्रक्रिया र फिजिकल फिटनेसमै बित्यो । यसमा नै समय खेर गयो ।’

टिमको तयारी सन्तोषजनक नभएपनि प्रशिक्षक लोप्साङले डिफेन्डिङ च्याम्पियनको उपाधि रक्षा गर्ने बताएका छन् । ‘हाम्रो मुख्य प्रतिद्धन्द्धी भनेको भारत नै हो । भारत कस्तो होला भन्ने मात्रै हो ।’ प्रशिक्षक लोप्साङले भने, ‘अन्य देशहरु हाम्रै स्तरको हो । सन्तोषजनक तयारी नभएपनि टिम स्पिरिट राम्रो छ । अन्य देशलाई पराजित गर्दै उपाधि जित्ने लक्ष्यमा हुनेछौं ।’ प्रशिक्षक लोप्साङले प्रतियोगिताको परिवर्तन भएको फरम्याटले खेलाडीहरुलाई एक्सपोज हुने बताए ।