काठमाडौं (हाम्रो खेलकुद)– अखिल नेपाल फुटबल संघ (एन्फा) ले झन्डै १० महिना पछि रुस्लान थ्री स्टार क्लबलाई क्षतिपूर्ति दिने विषयमा औपचारिक निर्णय गरेको छ । गत वर्ष एन्फाको गल्तिका कारण पहिलो चरण पार गरेर पनि थ्री स्टारले एएफसी कप खेल्न नपाएपछि क्लबले ६ करोड क्षेतिपूर्ति, दोषीमाथि कारवाहीको माग गरेको थियो ।

क्षतिपूर्ति दिने विषयमा एन्फा भित्र नै विवाद थियो । जसले पटक पटकको छलफल निर्णयमा पुग्न सकेको छैन । एन्फा अध्यक्ष नरेन्द्र श्रेष्ठको अध्यक्षतामा आज बसेको केन्द्रिय समितिको बैठकले थ्री स्टारलाई क्षतिपूर्ति वापत १ करोड ५० लाख रुपैयाँ दिने निर्णय गरेको छ । तर, त्यो निर्णय असोज २३ गते हुने एन्फाको विशेष साधारण सभाबाट अनुमोदनका लागि प्रस्तुत गरेपछि मात्र कार्यान्वयन प्रक्रिया अघि बढ्ने बताइएको छ ।

‘हामीले पहिलो पटक क्षतिपूर्ति दिने विषयमा औपचारिक निर्णय गरेका छौं,’ एन्फाका प्रमुख कार्यकारी अधिकृत इन्द्रमान तुलाधरले भने,‘ तर, त्यो विषय विशेष साधारण सभामा पेश गरिनेछ । त्यसले गर्ने निर्णयपछि कार्यान्वयनमा जानेछ ।’

क्षेतिपूर्ति नपाउँदा सम्म एन्फाले आयोजना गर्ने कुनै पनि प्रतियोगितामा भाग नलिने थ्री स्टारले निर्णय गरेको थियो । जेठमा आफ्ना अध्यक्ष ललितकृष्ण श्रेष्ठको स्मृतिमा आयोजित यू १८ फुटबल प्रतियोगितासहित थ्री स्टारले कुनै पनि प्रतियोगितामा भाग लिएन ।