लण्डन (एजेन्सी) – च्याम्पियन्स लिगको समूह एचमा इङ्ग्लिस क्लब टोटनह्याम हटस्पर्सले बोरुसिया डर्टमण्डलाई ३-१ ले पराजित गरेको छ । टोटनह्यामको जितका नायक रहेका फरवार्ड ह्यारी केनले दुई गोल गरेका थिए ।

बोरुसिया डर्टमण्डसँगको जितसँगै टोटनह्यामले आफ्नो च्याम्पियन्स लिगको अभियान सकारात्मक रुपमा सुरु गर्नुका साथसाथै वेम्ब्लीमा आफ्नो खराब प्रदर्शनको यात्राको पनि अन्त्य गरेको छ । स्थायी घरेलु मैदान व्हाइट हार्ट लेनको मर्मत चलिरहँदा टोटनह्यामले यस सिजन वेम्ब्लीमा आफ्ना घरेलु खेलहरु खेलिरहेको हो ।

खेलको चौथो मिनेटमै स्पर्सका लागि सन हिउङ मिनले आकर्षक गोल गर्दै घरेलु टोलीलाई खेलमा अग्रता दिलाएका थिए । तर एघारौँ मिनेटमा डर्टमण्डका आन्द्रि यार्मोलेन्कोले डि-बक्स बाहिरबाट गरेको प्रहारद्वारा डर्टमण्ड खेलमा फर्केको थियो । त्यस गोलको ४ मिनेट लगत्तै ह्यारी केनले बाँयातिरबाट गरेको प्रहारले सिधै जाली चुमेको थियो । खलेको दोस्रो हाफको ६० औँ मिनेटमा फेरी केनले नै गरेको गोलले टोटनह्यामको जित निश्चित भएको थियो । यहि साता प्रिमियर लिगमा पनि केनले एभरटन विरुद्ध दुई गोल गरेका थिए ।

आक्रामक देखिएको डर्टमण्डले खेलभरी राम्रा अवसर सिर्जना गरेपनि त्यसको सदुपयोग गर्न भने सकेको थिएन । दोस्रो हाफमा पियर-एमेरिक अबामेयाङ्ले गरेको गोललाई रेफ्रीले गलत रुपमा अफसाइड पनि दिएका थिए । इन्ज्युरी समयमा टोटनह्यामका डिफेन्डर जान भर्टोनगेनले रातो कार्ड पाएकाले अर्को खेल गुमाउने भएका छन् ।