म्याड्रिड (एजेन्सी)– क्रिस्टियानो रोनाल्डोले  १२ औं मिनेटमा नै गोल गरेको खेलमा साविक विजेता रियल म्याड्रिडले च्याम्पियन्स लिगमा सहज विजयी सुरुआत गरेको छ । रोनाल्डोले २ गोल गरेको खेलमा रियलले एपोएललाई ३–० ले हराएको छ ।

रोलान्डोमाथि स्पेनिस लिगमा अझै प्रतिबन्ध बाकी छ । सुपर कपको पहिलो लेगमा रेफ्रीलाई धक्का दिएपछि उनीमाथि पाँच खेलको प्रतिबन्ध लागेको छ । तर, जति बेला उनी खेलमा फर्कन्छन्, हरेक खेलमा उनको प्रभाव रहने गर्दछ ।

जिनेदिन जिदानको टोलीमा तिघ्राको चोटका कारण करिम बेन्जिमा समावेश थिएनन् । रियलले ला लिगमा पछिल्लो दुई खेलमा बराबरी खेलेको थियो । रोनाल्डोको पहिलो गोलका लागि गेराथ बेलको भूमिका रह्यो ।

१२ औं मिनेटमा काउन्टर एट्याकमा इस्कोले अघि बढाएको बललाई बेलले क्रस दिएपछि रोनाल्डाले घरेलु मैदानमा गोल गरेका थिए । लगत्तै बेलले अर्को पास दिएका थिए तर त्यसमा रोनाल्डोले हेड गरेको बल पोस्ट नजिकबाट बाहिरिएको थियो । दोस्रो हाफको सुरुआतमै रियलले गोलअन्तर दोब्बर पार्यो ।

रक्षक रोबेर्टो लागोको ह्यान्डपछि रियलले पेनाल्टी पायो र त्यसलाई रोनाल्डोले गोलमा परिणत गरे । च्याम्पियन्स लिगमा रोनाल्डोको त्यो १ सय सातौं गोल हो । ६१ औं मिनेटमा सर्जियो रामोसले बाइसाइकल किकमार्फत गोल गर्दै रियलको जित सहज बनाए । समूह एचको अर्को खेलमा टोटेनह्यामले बारुसिया डर्टमन्डलाई ३–१ ले हरायो ।