लिभरपुल (एजेन्सी)– पाँच पटकको च्याम्पियन्स लिग विजेता लिभरपुल आज च्याम्पियन्स लिगमा लगभग तीन वर्ष पछि पुनरागमन गर्दै छ । आज राती लिभरपुल समुह ‘ई’ मा सेभियासँग नेपाली समयअनुसार १२.३० बजे भिड्दै छ ।

अभ्यासका दौरान रियलका फरवार्ड रोनाल्डो ।

गत वर्ष प्रिमियर लिगमा चौथो स्थान हांसिल गर्दै लिभरपुलले आफ्नो च्याम्पियन्स लिगमा स्थान पक्का गरेको थियो । लिगमा म्यानचेस्टर सिटीसँग ५–० को भारी अन्तरको हारपश्चात लिभरपुल पुनः लयमा फर्कने कोसिसमा हुनेछ । समुह ‘ई’ को अर्को खेलमा स्पार्टाक मस्को र मारीबोर पनि भिड्दै छन् ।

त्यस्तै अर्को इङलिस टोली टोटनह्यामले आफ्नो अस्थायी घरेलु मैदान वेम्ब्लीमा जर्मन टोली बोरुसिया डर्टमन्डलाई निम्त्याउँदै छ । टोटनह्यामका लागि उसको स्टार मिड्फिल्डर डेले अल्ली गत सिजन युरोपा लिगमा रातो कार्ड पाएकाले यो खेलमा प्रतिबन्धित छन् ।

टोटनह्याम रहेको समूह ‘एच’ मा रियल म्याड्रिडले एपोएल निकोसियाको सामना गर्दै छ । गत सालको विजेता टोली रियलका लागि क्रिस्टियानो रोनाल्डोले यस सिजनको आफ्नो पहिलो खेल खेल्ने छन् भने करिम बेन्जिमा चोटका कारण खेलमा सहभागि हुने छैनन् । यसैगरी मार्को एसेन्सियोले खुट्टामा संक्रमणका कारण खेल गुमाउने छन् ।

समूह ‘एफ’ मा म्यानचेस्टर सिटीले फेयेनुर्डको सामना गर्ने छ । सिटीले आफ्नो कप्तान भिन्सेन्ट कम्पनीलाई पिडौंलाको चोटका कारण गुमाउने छ । समुहको अरु खेलमा नेपोली र शाख्तार डोनेस्क एक आपसमा भिड्दै छन् ।

त्यसैगरी समूह ‘जी’ मा आरबी लेपजिग र मोनाको पनि भिड्दै छन् । त्यस्तै पोर्टोले बेसिक्टासलाई आफ्नो घरलु मैदानमा निम्त्याउँदै छ । सबै खेलहरु नेपाली समयअनुसार १२.३० बजे सुरु हुने छन् ।