लन्डन (एजेन्सी)– अघिल्लो खेलको लिभरपुलसँगको नमिठो हारलाई पछि राख्दै आर्सनलले बोर्नमाउथमाथि ३–० को प्रभावशाली जित निकालेको छ । त्यस्तै गए राती टोटनह्याम र चेल्सीले पनि आ–आफ्ना खेलमा जित दर्ता गर्न सफल रहे ।

सुरुदेखि नै खेलमा पकड बनाएको आर्सनलले खेलको छैठौं मिनेटमा ड्यानि वेलबेकको गोलमार्फत अग्रता लिएको थियो । २७ औँ मिनेटमा पेनाल्टी बक्स छेऊबाट गरेको प्रहारबाट आर्सनलका नव खेलाडी एलेक्जेन्डर लाकाजेटले घरेलु टोलीको अग्रता दोब्बर बनाएका थिए । त्यस्तै खेलको ५० औं मिनेटमा वेलबेकले पुनः गोल गर्दै आर्सनलको जित पक्का गरेका थिए ।

यसैगरी गत सालको विजेता चेल्सीले दुई साल अघिको प्रिमियर लिग विजेता टोली लेस्टरलाई २–१ ले हराउन सफल रह्यो । चेल्सीले एल्भारो मोराटाको ४१ औं मिनेटको हेडरमार्फत खेलमा अग्रता लिएको थियो । लेस्टरका पूर्व खेलाडी एङोलो कान्टेको लामो दुरीको प्रहारको मद्दतले चेल्सीले दोस्रो हाफको सुरुमा खेल २–० बनाएको थियो । त्यसपछि जेमि भार्डिले पेनाल्टीबाट गोल गर्दै लेस्टरलाई खेलमा फर्काउन खोजे पनि सफल रहेनन् ।

टोटनह्याम पनि लयमा फर्कँदै एभर्टनलाई उसकै घरलु मैदानमा ३–० ले हराउन सफल रह्यो । टोटनह्यामका लागि ह्यारी केनले २ गोल गरे भने क्रिस्टियन एरिक्सनले १ गोल गरेका थिए । ह्यारी केनको खेलको पहिलो गोल उनले प्रिमियर लिगमा सयौँ गोल थियो ।

अन्य खेलमा ब्राइटनले वेस्ट ब्रोमलाई ३–१ ले हराउँदै सिजनको पहिलो जित दर्ता गर्यो । उसका लागि पास्कल ग्रोसले २ गोल गरेका थिए । त्यस्तै वाटफोर्डले साउथह्याम्टनमाथि २–० को जित निकाल्दै अंक तालिकामा चौथो स्थानमा उक्लेको छ । जितसँगै चेल्सी तेस्रो, टोटनह्याम पांचौं र आर्सनल नवौं स्थानमा उक्लेको छ ।