बार्सिलोना (एजेन्सी)– बार्सिलोनाले घरेलु मैदानमा आज इस्प्यानोललाई निम्त्याउदा प्रशिक्षक एर्नेस्टो भाल्भर्देले २० वर्षे फ्रेन्च स्ट्राइकर ओसामाने डेम्बेलेलाई ‘डेब्यू’ गराउने सम्भावना छ । कीर्तिमानी रकममा जर्मनीको बोरुसिया डर्टमाउन्डबाट बार्सिलोना पुगेका डेम्बेलेलाई नेयमारको विकल्पका रुपमा हेरिएको छ । 

उता पिएसजीमा सुरुबाट प्रवाव देखाएका नेयमार र सरुवा बजारमा चर्चामा रहेका किलियन बाप्पेले पहिलो खेलमा गोल गर्दा डेम्बेलेलाई पनि केहि दबाब हुन सक्छ । केहि समय यता चोटका कारण मैदान बाहिर रहेका उरुग्वेली स्ट्राइकर लुइस स्वारेज अन्तर्राष्ट्रिय खेलबाट फिट फर्किएपछि टोलीको अग्रपक्तिमा लियोनल मेस्सीलाई सहयोग मिल्ने आशा गरिएको छ ।

अर्जेन्टिनाबाट खेल्दा गोल गर्न नसकेका मेस्सी ला लिगामा भने पुरानै लयमा देखिने अपेक्षा गरिएको छ । काटालन डर्बीमा विपक्षी टोली काउन्टर एट्याकमा बलियो हुन सक्ने भाल्भर्देको चिन्ता छ । उनले भने ‘हामीले आक्रामक इस्प्यानोलको सामना गर्नेछौं । उनीहरु काउन्टर एट्याकमा बलियो छन् ।’

भ्रमणकारी टोलीका प्रशिक्षक कुइक्यू सान्चेस फ््लोरेसले घरेलु टोलीलाई कडा प्रतिस्पर्धा दिने बताएका छन् । उनले भने,‘बार्सिलोना हामी भन्दा बलियो टोली हो । तर हामी उनीहरुलाई कडा चुनौति दिनेछौं ।’