म्याड्रिड (एजेन्सी) – स्पेनिस ला-लिगामा गत सालको विजेता रियल म्याड्रिड लेभान्टेसँग भिड्दै छ । यस सिजन दुवै टोलीले दुई खेलमा एक जित र एक बराबरी खेल्दै ४ अंक बटुलेका छन् ।

सिजनका अघिल्ला खेलहरुमा रियलले डेपोर्टिभोलाई ३-० ले हराएको थियो भने भ्यालेन्सियासँग २-२ को बराबरी खेलेको थियो । अर्को तर्फ लेभान्टेले भियारियललाई १-० ले हराएर डेपोर्टिभोसँग २-२ को बराबरी खेलेको थियो ।

रियल म्याड्रिडका स्टार खेलाडी क्रिस्टियानो रोनाल्डो यस खेलमा सहभागी हुने छैनन् । बार्सिलोनाविरुद्धको सुपरकपको पहिलो लेगमा रेफ्रिलाई धकेलेको आरोपमा उनले ५ खेलको प्रतिबन्ध पाएका थिए । यसैगरी पहिलो खेलमा रातो कार्ड पाएका सर्जियो रामोस भने टोलीमा फर्कँदै छन् । रियल म्याड्रिडका अर्का डिफेन्डर राफायल भरान सामान्य चोटका कारण खेल्ने निश्चित छैन । गोलरक्षक केलर नाभास अन्तर्राष्ट्रिय खेल खेलेर शुक्रबार मात्र टोलीमा फर्केका कारण उनको स्थान किको कासिल्लाले लिने सम्भावना छ ।

लेभान्टेको तर्फबाट होसे मोरालेस डेपोर्टिभोसँग दुईवटा पहेंलो कार्ड पाएका कारण यस खेलका लागि प्रतिबन्धित छन् । राम्रै लयमा देखिएकाले लेभान्टेले टोलीमा खासै हेरफेर नगर्ने सम्भावना छ । रियल म्याड्रिड आफ्नो घरेलु मैदानमा खेलेका पछिल्ला २५ मध्ये २४ मा अपराजित छ । यसैगरी रियलले लेभान्टे विरुद्ध खेलेका पछिल्ला ९ खेल आफ्नो पक्षमा पारेको छ । खेल आज बेलुका नेपाली समय अनुसार ४.४५ बजे सुरु हुने छ ।