दिपेन्द्र पोखरेल

काठमाडौं – नेपाली फुटबलका अधिकांश स्टारहरुले लक्ष्मी हुन्डाई मनाङ मस्र्याङ्दी क्लब वा रुस्लान थ्री स्टार क्लबबाट खेल्ने सपना पालेका हुन्छन् । त्यसमध्ये कतिको पुरा हुन्छ भने कसैको पुरा नहुन पनि सक्छ । यस्तैमा राष्ट्रिय टोलीमा नियमित मिडफिल्डर अञ्जन विष्टले आज मनाङबाट ‘डेब्यू’ गर्ने अवसर पाएका छन् ।

मनाङबाट बिहीबार ‘डेब्यू’ गरेका अन्जन विष्ट आरामका क्रममा । तस्बिर सौजन्य -मनोज थापा

चितवनमा जारी प्रथम इप्लानेट जेसिज कप फुटबल प्रतियोगितामा उनले रमपम झापाविरुद्ध मनाङबाट खेलेका थिए । यद्दपी उनको मनाङसँगको यात्रा अहिले जारी प्रतियोगितासम्म मात्र रहेको छ । यसअघि उनी एपिएफसँग करारमा रहेका थिए । एपिएफ पनि जेसिज कपमा अन्तिम चारमा पुगिसकेको छ । अन्जनका दाजु रञ्जन अहिले पनि एपिएफमै छन् ।

‘अहिलेलाई यो प्रतियोगिता खेल्ने सहमति भएर आएको हु । एपिएफ छाड्ने अथवा मनाङमा स्थायी रुपमा आवद्ध त्यस्तो केही निश्चित भएको छैन, अन्जनले हाम्रो खेलकुद डटकमसँग भने,‘पहिलो पटक मनाङबाट खेल्न पाउँदा खुसी लागेको छ । राष्ट्रिय टोलीबाट खेल्ने खेलाडी नै धेरै भएकोले खेल्न पनि सहज भयो ।’

अन्जनसँगै राष्ट्रिय टोलीका अर्का सदस्य अनन्त तामाङ पनि खेलेका थिए । राष्ट्रिय टोलीकै अन्य खेलाडी विराज महर्जन, कमल श्रेष्ठ, हेमन्त थापा मगर, विमल बस्नेत, विशाल राई, सुजल श्रेष्ठ मनाङका नियमित खेलाडी हुन् ।

अन्जनले चितवनको गर्मीमा खेल्न भने केही कठिन भएको सुनाए । ‘पहिलो खेल भएर पनि होला गर्मीले खेल्न अलि गाह्रो भयो,’ गत पुसमा सातौं राष्ट्रिय खेलकुदमा एपिएफलाई स्वर्ण पदक दिलाउन फाइनलमा २ गोल गरेका अन्जनले भने,‘ सेमिफाइनलमा राम्रो हुन्छ भन्ने विश्वास छ ।’

बिहीबारनै चितवन पुगेका अन्जनले दुई दिनअघि एएफसी एसियन कपमा ताजकिस्तानविरुद्धको एक मात्र गोलमा महत्वपूर्ण भूमिका निर्वाह गरेको थियो । पहिलो हाफमा २–० ले पछि परेको खेलमा दोस्रो हाफमा नेपालका लागि विमल घर्तीमगरले गोल फर्काएका थिए । अन्जनले निकालेको स्तरीय ‘थ्रु’ पासमा विमल गोल गर्न सफल भएका थिए । यद्दपी त्यो खेल नेपालले २–१ ले गुमाएको थियो ।

नारायणगढको क्याम्पाचौरमा जारी प्रतियोगितामा झापासँगको निर्धारित ८० मिनेटको खेलमा १–१ को बराबरी भएपछि मनाङले झापालाई टाई ब्रेकरमा ५–३ ले पराजित गर्दै सेमिफाइनलको यात्रा तय गरेको थियो । जसमा अन्जनले पनि गोल गरेका थिए । मनाङ अब शनिबार अन्जनको गृहनगर हेटौडाको विजय युथ क्लबको सामना गर्नेछ ।