• काठमाडौं (हाम्रो खेलकुद)– ताजकिस्तानसँगको एएफसी एसियन कप छनोट चरण खेल्न आएका राष्ट्रिय टोलीका गोलकिपर किरण चेम्जोङ आज साँझ माल्दिभ्स फर्कदैछन् । कतार एयरवेजबाट कतार हुँदै उनी भोली बिहान माल्दिभ्स पुग्नेछन् । माल्दिभ्सको टिसी स्पोर्टसबाट व्यवासयिक फुटबल खेल्दै आएका किरणको टोलीको धिवेही प्रिमियर लिग (डिपिएल) मा पाँच दिनपछि खेल छ ।

उनी भदौं १० मा स्वदेश आइपुगेका थिए । ताजकिस्तानसँग मंगलबार २–१ ले पराजित भएपछि भने किरण निराश भएर फर्कदैछन् । ‘पहिलो हाफमा हामी निकै दबाबमा खेल्यौं । तर, दोस्रो हाफमा हाम्रो प्रदर्शनमा सुधार आएको थियो’ किरणले भने, ‘दोस्रो हाफको प्रदर्शन सुरुबाट गर्न सकेको भए जित्न सकिन्थ्यो, नभए कम्तीमा बराबरी हुन्थ्यो । तर सोचे जस्तो भएन । यसले अगाडिको यात्रामा दबाब पर्ने भयो ।’

टोलीलाई सफलता दिलाउन नसकेपनि व्यक्तिगत रुपमा किरणका लागि यो साता केही सुखद रह्यो । नेपाली खेलकुदको प्रतिष्ठित अवार्ड पल्सर स्पोर्टस अवार्डको बर्षका उत्कृष्ट खेलाडी पुरुषको मनोयनमा उनी परेका छन् । भदौ २६ मा हुने अवार्डमा सरिक हुन नसक्ने हुँदा भने उनी खिन्न छन् । ‘मनोनयनमा पर्न सफल भए । केही गरेको महसुस भएको छ ’ उनले हाम्रो खेलकुद डटकमसँग खुसी साटे, ‘देशकै ठूलो अवार्ड कार्यक्रममा आफु मनोनयन हुँदा पनि बस्न नपाउने भए । साच्चै मैले अवार्ड प्रोग्राम मिस गर्नेछु । मनोनयनमा पर्नु निकै खुसीको कुरा हो ।’

तीन दिनअघि मात्र उनी अन्य ७ खेलाडीसँगै राष्ट्रिय प्रतिभा २०७४ बाट सम्मानित भएका थिए । युवा तथा खेलकुद मन्त्रालयले सम्मान गर्दै उनलाई १ लाख रुपैयाँ प्रदान गरेको थियो । ‘व्यक्तिगत रुपमा यो पटकको यात्रा स्मरणीय रह्यो ’ उनले भने, ‘अझ खेल्न जित्न सकेको भए खुसीको कुनै सिमा हुने थिएन । दुर्भाग्य जित्न सकिएन । बाँकी खेलमा राम्रो नतिजाका लागि प्रयास गर्नेछौं ।’ माल्दिभ्सको डिपिएलमा ८ टोलीको सहभागिता रहेको छ । उनको टोली अंकतालिकाको चौथो स्थानमा छ । उनको टोलीले डिपिएलका ४ खेलमा २ मा जित, १ मा बराबरी र अर्कोमा हार बेहोरेको छ ।