ललितपुर (हाम्रो खेलकुद) – एएफसी एसियन कप छनोटमा पहिलो जित निकालेको खुसी हुँदै ताजकिस्तानका प्रशिक्षक खाकिम फुजायोलोभले नेपाली टोली कमजोर नरहेको बताएका छन् । 

सातदोबाटोस्थित एन्फा कम्प्लेक्सको मैदानमा नेपाललाई २–१ ले हराएपछि फुजायोलोभले भने, ‘नेपालसँगको आजको खेल हाम्रो लागि एसियन कप छनोटमा रहिरहन निकै महत्वपूर्ण थियो । अर्को चरण पुग्ने सम्भावना जीवित राख्न नेपाललाई जित्नै पर्ने दबाब थियो । ३ अंक लिन सफल भयौं । हाम्रो लक्ष्य एसियन कपमा छनोट हुने हो ।’

प्रशिक्षक फुजायोलोभले समूहमा फिलिपिन्सको स्तर भने समूहमा अन्य टोलीभन्दा माथि रहेको पनि बताए । उनले भने,‘नेपाल पनि सबै टिमलाई चुनौती दिन सक्ने टोली हो । अब घरेलु मैदानमा हुने खेलमा नेपाललाई पुनः हराउने हाम्रो योजना हुनेछ ।’

यता नेपाली टोलीका प्रशिक्षक ग्यातोकु कोजुले ताजिकिस्तानसँगको खेलमा सोचने अनुरुपको प्रदर्शन हुन नसकेको बताए । ‘ताजिकिस्तानको खेल हेरेर रणनीति बनाएका थियौं । तर, मेरा खेलाडीले सोचेजस्तो खेल्न सकेनन्,’ प्रशिक्षक कोजीले भने, ‘दोस्रो हाफमा खेलाडी परिवर्तन गर्दा केही सुधार भएपनि सन्तोषजनक खेल भएन । अर्को खेलमा यसलाई सुधार गर्नेछौं ।’

पहिलो पटक राष्ट्रिय टोलीमा समेटिएका प्रिन्स जर्ज कार्कीले सोही खेलमार्फत ‘डेब्यू’ गरेका थिए । प्रशिक्षक कोजीले गोल गर्ने विषयलाई प्राथमिकतामा राखेर प्रिन्सलाई मौका दिएको बताए । ‘प्रिन्स राष्ट्रिय टोलीका लागि नयाँ खेलाडी हुन् । उनी मिहेनती छन्,’ कोजीले थपे, ‘आउने खेलका लागि सहज होस् भनेर उनलाई घरले मैदानमा पहिलो पटक खेलाएका हौं ।’