काठमाडौं (हाम्रो खेलकुद) – एएफसी एसियन कप छनोटको अघिल्लो चरण पुग्ने सम्भावनालाई जीवित राख्न नेपालको खेल आजका लागि महत्वपूर्ण छ । यसअघिका २ खेलमा १ हार र १ मा बराबरी गरेको नेपालले आज ताजकिस्तानको सामना गर्दैछ । खेल सातदोबाटोस्थित एन्फा कम्प्लेक्सको ‘एस्ट्रो टर्फ’मा हुनेछ । ताजकिस्तानले यसअघिका दुवै खेल गुमाइसकेको छ । त्यसैले उसका लागि पनि यो खेल त्यत्तिकै महत्वपूर्ण छ ।

ताजकिस्तानसँगको खेलका लागि नेपालले केही साताअघि जापान भम्रण गरेको थियो । जहाँ नेपालले विश्वविद्यालयका टोली र अन्य क्लबसँग गरि ५ वटा मैत्रीपूर्ण खेल खेलेको थियो । यसअघिका छनोटमा भन्दा नेपालले यस पटकको तयारीमा बढी मैत्रीपूर्ण खेलको अवसर पाएको थियो ।

विना कुनै मैत्रीपूर्ण खेल चैतमा फिलिपिन्ससँग खेलेको नेपालले जेठमा यमनसँग खेल्नुअघि भारतसँग मैत्रीपूर्ण खेल खेलेको थियो । समूहमा फिलिपिन्स सबैभन्दा बलियो टोलीका रुपमा रहेको । पहिलो खेलमा नेपाल फिलिपिन्ससँग ४–१ ले पराजित भएको थियो । यमनसँगको खेलमा गोलरहित बराबरी खेल्दै नेपालले पहिलो अंक जोडेको थियो । ताजकिस्तानलाई हराउन सकेको खण्डमा नेपालको दाबेदारी पनि केही बलियो हुन सक्नेछ ।

नेपाली टोलीका जापानी प्रशिक्षक ग्यातुको कोजी र कप्तान विराज महर्जनले ताजिकिस्तानविरुद्ध जितको आशा व्यक्त गरेका छन् । कोजीले पहिलो पटक टोलीमा समेटिएका जर्ज प्रिन्स कार्कीले ‘डेब्यू’ गर्ने सम्भावना रहेको पनि संकेत गरेका छन् ।