लन्डन (एजेन्सी) – म्यानचेस्टर युनाइटेडका १९ वर्षीय स्ट्राइकर मार्कस रास्फोर्डको उत्कृष्ट गोलको मद्दतमा इङ्ल्यान्डले विश्व कप छनोटमा गए राति स्लोभाकियालाई २-१ ले हराएको छ । दोस्रो स्थानको स्लोभाकियाविरुद्ध जितेपछि इङ्ल्यान्डको रुस विश्व कपमा छनोट हुने सम्भावना बलियो बनेको छ ।

लन्डनको वेम्ली मैदानमा भएको खेलको सुरुआतमा घरेलु टोली पछि परेको थियो । तेस्रो मिनेटमा स्टानिसलाभ लोबोक्टाले पहिलो टचमा राम्रो नियन्त्रण गर्दै गोलरक्षक जो हार्टलाई नघाउँदै गोल गरेका थिए ।

तर इङ्ल्यान्डले पहिलो हाफमै खेलमा बराबरी गर्यो । ३७ औं मिनेटमा रास्फोर्डले प्रहार गरेको कर्नरमा एरिक डायरले हाफ भली मार्फत नियर पोस्टको टप कर्नरको दिशामा प्रहार गर्दै गोल गरेपछि खेल बराबरी पुगेको थियो ।

रास्फोर्डले ५९ औं मिनेटमा उत्कृष्ट इङ्ल्यान्डलाई अग्रता दिलाए । इङ्ल्यान्डका लागि दोस्रो गोल गर्ने क्रममा रास्फोर्डले २२ यार्डबाट गरेको प्रहारले फार पोस्टमा जाली चुमेको थियो । त्यही गोल खेलको निर्णायक बन्यो । जितसँगै अपराजित इङ्ल्यान्ड समूह ‘एफ’मा ६ जित र २ बराबरीका साथ २० अंक सहित शीर्षस्थानमा कायम छ । दोस्रो स्थानको स्लोभाकियाको १५ अंक छ ।

विश्व कप छनोट अन्तर्गतका अन्य नतिजाहरु :

समूह ‘एफ’ : स्कटल्यान्ड २-० माल्टा , स्लोभेनिया ४-० लिथुआनिया

समूह ‘सी’ : अजरबैजान ५-१ सान मरिनो , जर्मनी ६-० नर्वे , नर्दन आयरल्यान्ड २-० चेक रिपब्लिक

समूह ‘ई’ : अर्मेनिया १-४ डेनमार्क , मोन्टेनिग्रो १-० रोमानिया , पोल्यान्ड ३-० काजकिस्तान