भद्रपुर (हाम्रो खेलकुद)– मुनाल क्लब भद्रपुरले सञ्चालन गरेको चन्द्रगढी फुटबल एकेडेमीले अर्को महिना एकेडेमी स्तरीय नकआउट फुटबल प्रतियोगिता आयोजना गर्ने भएको छ ।

झापा जिल्लामा रहेको एकेडेमीमा प्रशिक्षण गरिरहेका खेलाडीबीचको प्रतिस्पर्धाले स्तरीय खेलाडी उत्पदान गर्न मद्दत पुगोस् भन्ने उद्देश्यका साथ प्रतियोगिता आयोजना गर्न लागिएको आयोजक चन्द्रगढी एकेडेमीले जनाएको छ ।

असोज २ देखि ११ गतेसम्म दस दिन सम्म मेची रंगशालामा हुने प्रतियोगिताबाट बचत हुने रकम चन्द्रगढी एकेडेमीका खेलाडीको स्तरबृद्धिका लागि खर्च गरिने प्रतियोगिता संयोजक युगल किशोर राईले सोमबार आयोजित पत्रकार सम्मेलनमा बताएका छन् । राई पूर्व राष्ट्रिय खेलाडी हुन् ।

अर्को वर्षदेखि एकेडेमी स्तरीय प्रतियोगितालाई होम एन्ड अवे लिगका आधारमा सञ्चालन गर्ने बताइएको छ । यसपटकको प्रतियोगिताका काकरभिट्टा, विर्तामोड, सैनिक, केर्खा, दमक, जलथल, मंगलबारे, एपिएफ दमक र आयोजक चन्द्रगढी फुटबल एकेडेमीले प्रतिस्पर्धा गर्नेछन् ।

प्रतियोगिताको विजेता टोलीले १ लाख १ हजार, दोस्रो हुने टोलीले ५१ हजार रुपैयाँ प्राप्त गर्ने आयोज समितिका सचिव केशव मैनालीले बताए । समितिका कोषाध्यक्ष हिम्मत पाण्डेका अनुसार प्रतियोगितामा झन्डै १० लाख रुपैयाँ खर्च हुनेछ ।

मेची रंगशाला ।