लन्डन (एजेन्सी)– इङ्ल्यान्डका प्रशिक्षक ग्यारेथ साउथगेटको भनाई मान्ने हो भने इङ्लिस स्ट्राइकर ह्यारी केन आफ्नो गोलको रेकर्ड लियोनल मेस्सी र क्रिस्टियानो रोनाल्डोसँग तुनाला गर्छन् । प्रिमियर लिगमा लगातार २ सिजन गोल्डेन बुट आफ्नु नाममा गरेका टोटेनह्यामका स्ट्राइकर केन राष्ट्रिय टोलीका लागि लयमा छन् । 

उनले इङ्ल्यान्डका लागि २० खेलमा १० गोल गरिसकेका छन् । जस मध्ये ५ गोल पछिल्ला ४ खेलमा गरेका हुन् । केनको प्रसंशा गर्दै प्रशिक्षक साउथगेट केनमा विश्वको उत्कृष्ट खेलाडी बन्ने मानसिकता रहेको बताउँछन् ।

‘केन अहिले उत्कृष्ट लयमा छन् । उनमा विश्वको उत्कृष्ट खेलाडी बन्न चाहिने मानसिकता छ,’ साउथगेटले भने, ‘मैले कति गोल गरेको छौ भन्ने प्रश्न गर्दा उनले त्यसको जवाफ दिए । अहिलेको उनको उमेरमा मेस्सी र रोनाल्डोले राष्ट्रिय टोलीबाट कति गोल गरेका थिए भन्ने जानकारी रहेछ ।’

केन आउदो जुलाईमा २५ वर्ष पुरा हुदैछन । यो उमेरमा मेस्सीले अर्जेन्टिनाबाट २६ र रोनाल्डोले पोर्चुगलबाट २२ गोल गरेका थिए । स्पेनका प्रशिक्षक जुलेन लोपेटेगुइको पनि केनको प्रशंसक रहेको साउथगेटले बताए । ‘मैले स्पेनका प्रशिक्षक लोपेटेगुइसँग छोटो कुरा गरेको थिए,’ उनले भने, ‘ उनले मलाई टोलीमा केन जस्ता खेलाडी पाउनु भाग्यको कुरा भएको बताए ।’